اطلاعات روز: کابل کې د طالبانو والي محمد قاسم خالد په پلازمېنه کې د اوبو د کمښت بحران ته د رسيدګۍ په موخه له ملګرو ملتونو د همکارۍ غوښتنه کړې ده.
نوموړي دا غوښتنه په افغانستان کې د ملګرو ملتونو د مرستندوی پلاوي (يوناما) د مرکزي زون د دفتر له رييس آنيت ليت سره په ليدنه کې کړې ده.
د کابل د ولايت مقام دفتر په یوې خبرپاڼه کې ويلي، چې د طالبانو والي په کابل ښار کې د اوبو د کمښت ستونزې ته په اشاره سره ويلي، چې د پلازمينې وګړي پاکو اوبو ته د نه لاسرسي له کړکېچ سره مخ دي.
په کابل کې د اوبو کمښت، په ځانګړې توګه د پلازمېنې په لوېديځه برخه کې يوه جدي ننګونه ده. ويل کېږي چې تر ځمکې د لاندې اوبو د کمښت له کبله ځينې څاوې وچې شوي او د ځينو نورو اوبه کمې شوې دي.
په کابل کې د طالبانو والي له يوناما څخه غوښتي چې په پلازمېنه کې دې د اوبو د کمښت کړکېچ ته د رسيدګي په لړ کې مرسته وکړي.
د يوناما د مرکزي زون د دفتر رییس ويلي، چې دا دفتر غواړي د پلازمينې په بېلابېلو برخو کې پروژې عملي کړي.
ده زياته کړې چې يوناما د ښې حکومتولۍ او د خلکو د ټولنيزو ستونزو د حل په برخه کې هم غونډې جوړوي.
