اطلاعات روز: لغمان کې د طالبانو ځايي چارواکي وایي، چې د دغه ولایت په مرکز مهترلام او یو شمیر ولسوالیو کې د پاکو اوبو رسونې دوه شبکې جوړې او د لسو نورو د جوړېدو چارې پېل شوې.
لغمان لپاره د طالبانو والي قاري ذین العابدین عابد وايي، دغه شبکې د مهترلام ښار په چهاردهي او عصمت قرارګاه سیمو کې جوړې او تېره ورځ (دوشنبه، ۲۴ د تلې) ګټې اخېستنې ته وسپارل شوې.
نوموړی زیاتوي، یادې دوه شبکې د یونیسف په مالي ملاتړ د ۹.۵ میلیونه افغانیو په لګښت جوړې شوي، چې څه باندې ۵۰۰ کورنۍ به ترې د څښاک لپاره ګټه پورته کړي.
عابد دغه راز وویل، چې د لغمان په پنځه ولسوالیو کې هم د یونېسف په مالي ملاتړ د څښاک د پاکو اوبو رسونې د لسو نورو شبکو د جوړېدو چارې پېل شوې دي.
د لغمان لپاره د طالبانو والي وایي، پر دغو شبکو ۴۰ مېلیونه افغانۍ لګښت راځي، چې په جوړېدو سره به یې شاوخوا ۳۰۰۰ کورنیو ته د څښاک د پاکو اوبو زمینه برابره شي.
نوموړي زیاته کړه، چې د پاکو اوبو رسونې دغه شبکې په الینګار، الیشنګ، قرغیو، دولت شاه او بادپښ ولسوالیو کې جوړېږي.
د لغمان په لېرې پرتو سیمو کې لاهم ګڼې کورنۍ د څښاک پاکو اوبو ته د نه لاسرسي له کبله له ګڼو ستونزو سره مخ دي او غوښتنه کوي، چې نړۍ والې مرستندویه ادارې دې په دې برخه کې لازم ګامونه واخلي.
