اطلاعات روز: د ملګرو ملتونو د بشري مرستو د همغږۍ دفتر (اوچا) د خوړو په نړيواله ورځ ويلي، چې د افغانستان په لوېديځ کې د زلزلې له امله لسګونه زره زیانمن شوي کسان مرستو او خوړو ته اړتيا لري.
اوچا نن (دوشنبه، ۲۴ د تلې) پر خپله ايکس پاڼه ليکلي، چې د خوړو نړيواله ورځ په داسې حال کې را رسېدلې چې په دې وروستيو ورځو کې د افغانستان لوېديځ زلزلې لړزولی دی.
د اوچا په وينا، د هيواد په لوېديځ کې تر ۴۳ زره او ۳۳۵ تنه زيات کسان له زلزلې اغېزمن شوي دي.
دې دفتر زياته کړې چې مرستندوی بنسټونه اوس مهال په ټولو ځپل شويو سيمو کې ترکيبي او بشپړوونکو خوراکي مواد رسوي.
نن ورځ د خوړو له نړيوالې ورځې سره برابره ده.
د خوړو نړيوال پروګرام هم د دې ورځې په مناسبت پر خپله ايکس پاڼه ليکلي: «د خوړو په نړيواله ورځ نړۍ ته ور يادوو چې په افغانستان کې ۱۵ ميليونه خلک نه پوهېږي چې خپل راتلونکی خوراک به له کومه کړي. يعنې د نفوس ۳/۱ برخه.»
دې سازمان زياته کړې، چې په هرات کې زلزله د يوه وخيم انساني کړکېچ په څنګ کې يو بل ناورين دی.
د خوړو نړيوال پروګرام زياته کړې چې «افغانان بېړني ملاتړ ته اړتيا لري».
افغانستان هغه هيواد دی چې په نړيواله کچه پکې د خوړو د ناامنۍ سطح لوړه ده. پر هیواد د طالبانو تر واکمنېدو وروسته فقر او لوږه زيات شوي.
له بله اړخه، په افغانستان کې مرستندوی بنسټونه هم د بودیجې له کمښت سره مخ دي.
په عين حال کې، د تېرې اونۍ پرمهال د ژمي په را رسېدو سره يوې ويجاړوونکې زلزلې د هيواد لوېديځ ولړزاوه.
دې پېښې په هرات کې تر دوه زرو د زياتو کسانو ژوند واخيست او پراخه ويجاړي يې رامنځته کړه.
