اطلاعات روز: د افغانستان او انګلستان لوبډلې نن د کرکټ د نړيوال جام په ۱۳ لوبه کې سره مخامخ شوې چې افغانستان وتوانېد انګلستان ته په لومړي ځل په ۶۹ منډو ماتې ورکړي.
د افغانستان او انګلستان تر منځ لوبه نن (يکشنبه، ۲۳ د تلې) د هند په ډيلي کې وشوه چې انګلستان د ټاس په ګټلو د توپ اچونې پرېکړه وکړه.
د افغانستان له لوري د توپ وهنې پيل ښه و او د پيل لوبغاړي رحمان الله ګربز تيزې ۸۰ منډې وکړې. افغانستان خپله لومړۍ ويکټ پر ۱۱۴ منډو وبايلله.
تر دې وروسته افغان لوبغاړي ونه توانېدل چې د منډو بهير د مخکې په څېر روان وساتي او پرلپسې يې ويکټې وبايللې خو د اکرام علي خېل پنځوسيزې او په وروستيو کې د راشد او مجيب له لوري تېزو منډو له افغانستان سره مرسته وکړه چې د ۲۸۵ دفاع وړ هدف وټاکي.
د انګلستان له لوري د منډو پيل ښه نه و او پر لومړيو درو منډو يې د سر لوبغاړی له لاسه ورکړ.
تر دې وروسته يې نور لوبغاړي هم په ميدان کې ډېر تم نشول خو د انګلستان له لوري هيري بروک تر ټولو ډېري ۶۶ منډې وکړې او پر ۲۱۵ منډو يې ټوله لوبډله وسوځېدله.
د افغانستان له لوري مجيب الرحمان او راشد خان درې، محمد نبي دوې او فضل الحق فاروقي او نوين الحق يوه-يوه ويکيټ تر لاسه کړه.
د يادونې وړ ده چې افغانستان تر دې وړاندې په نړيوال جام کې خپلې لومړنۍ دوې لوبې بنګله دېش او هند ته بايللې دي.
افغانستان به د اکتوبر پر ۱۸ نېټه له نيوزيلينډ سره مخامخ کېږي.
