اطلاعات روز: پاکستانۍ رسنيو د دې هيواد د چارواکو په وينا راپور ورکړی چې پاکستانی دولت به د «غير قانوني» کډوالو د شړلو پر پرېکړه بيا ځلې غور ونه کړي.
پاکستان د ۱.۷ ميليونه افغان وګړو په ګډون ټولو «غير قانوني» کډوالو ته د اکټوبر مياشتې تر ۳۱مې نيټې وخت ورکړی چې په رضاکاره توګه ووځي او که ونه وځي، نو د نوامبر له لومړۍ نيټې څخه به په جبري توګه وشړل شي.
د پاکستان دې پرېکړي د بشري حقونو د سازمانونو انديښنې راپارولې دي.
د ايکسپريس ټريبيون په وينا، پاکستاني چارواکو ويلي، چې د بشري حقونو سازمانونه او د ملګرو ملتونو اړوندې ادارې د دې پرېکړې د ارزولو لپاره اسلام اباد ته تللي دي.
له دې راپور سره سم، د کډوالو په چارو کې د ملګرو ملتونو عالي کمیشنرۍ (يو اين ايچ سي آر) او د کډوالۍ نړيوال سازمان (آی او ايم) «د افغان وګړو د ثبت او مديريت لپاره د يوه هر اړخيز او پايدار ميکانيزم د جوړولو» لپاره د پاکستان ملاتړ اعلان کړی.
دې بنسټونو له پاکستانه مننه کړې چې د افغان کډوالو کوربتوب يې کړی او په عين حال کې يې له پاکستاني دولت څخه غوښتي چې د بشري حقونو نقض ته پام وکړي چې ښايي د کډوالو د شړلو له کبله پېښ شي.
ايکسپريس ټريبيون ليکلي، چې چارواکو د سېشنبې په ورځ وويل چې پاکستان دهغو ټولو بهرنيو وګړو چې ډېری يې افغانان دي او په پاکستان کې په غير قانوني توګه اوسي، د شړلو لپاره خپله پرېکړه نه بدلوي.
د پاکستان لنډمهالي لومړي وزير انور الحق کاکړ د غیر قانوني کډوالو د شړلو لپاره د دولت د سياست دفاع کړې ده.
ده يوې پوښتنې ته په ځواب کې ويلي، چې پاکستان به «تسليم» نه شي او د ټولو غير قانوني کډوالو د شړلو لپاره به خپل سياست مخته وړي.
خو نوموړي څرګنده کړې، چې دا د افغان کډوالو ځپل نه دي او د ده په وينا، افغان وګړي تر شړل کېدو وروسته کولای شي پاکستان ته راشي خو ځانګړي پروټوکولونه به مراعتوي.
د پاکستان لومړي وزير د دې پوښتنې په ځواب کې چې ايا له افغان طالبانو څخه د پاکستان ملاتړ معکوسه پايله ورکړې او که نه، وويل، دا ادعا سمه نه ده چې طالبان د اسلام اباد په مرسته واک ته رسېدلي.
کاکړ د افغانستان او پاکستان د اړيکو د اوسني وضعيت په تړاو پوښتنې ته په ځواب کې ويلي: «طالبان د افغانستان واقعيت دي او موږ بايد له هغوی سره کار وکړو.»
د طالبانو او پاکستان اړيکې د وروستيو دوو کلونو پرمهال ترينګلې شوې دي. د دواړو اړخونو د خرابو اړيکو لامل د پاکستاني طالبانو فعاليت او له افغان کډوالو سره د پاکستان چلند دی.
