اطلاعات روز: له هيواده بهر ځيني ډلې او د افغانستان – جرمني ځيني سازمانونه، د بشري حقونو او ښځينه حقونو فعالان او د مدني ټولنې غړي وايي، خبر شوي دي چې د طالبانو يو شمېر غړي په اکتوبر مياشت کې د بېلابېلو ليدنو او په بين الافغاني خبرو-اترو کې د ګډون لپاره جرمني ته سفر کوي.
دوی په يوه سرخلاصي ليک کې چې نن (چهارشنبه، ۵ د تلې) خپور شوی، د جرمني له دولت او د اروپا له پارلمان څخه غوښتي چې د طالبانو دې غړو ته دې ويزه نه ورکوي.
په دې ليک کې راغلي دي چې «موږ په بېړنۍ توګه له تاسو غواړو چې د طالبانو د غړو لپاره د ويزو په ورکړه کې بيا ځلې فکر وکړئ ځکه دا ډله د افغانستان د ميليونونو خلګو پر خلاف په تروريستي اقداماتو کې شريکه ده او د جنسيتي اپارتايډ په شمول د بشري حقونو د نقض اوږده مخينه لري.»
د دې ليک لاسليک کوونکو ويلي دي چې په پر له پسې توګه بشري حقونو ته د طالبانو نه پاملرنې او [د دوی له لوري] د جنايت د تشديد دوام ته په پام، دوی ته د ويزې ورکول له اروپايي ارزښتونو سره په تضاد کې دي او دې ډلې ته د بې مخينې مشروعيت ورکولو خطر را پيدا کوي.
دوی ويلي چې طالبانو ته د ويزې ورکړه او اروپا ته د سفر کولو اجازه ورکول د افغانستان له خلګو سره مرسته نه کوي، بلکې په ناغوښتل شوې توګه دې ډلې ته مشروعيت ورکوي او له نجونو، ښځو او هغو خلګو سره خيانت کېږي چې د دوی تر شکنجې او ځور او اذيت لاندې دي.
دوی ويلي دي چې د خبرو-اترو په ارزښت او د شخړو د سولييز حل په لټون خبر دي؛ خو پرېکنده دريځ يې دادی چې «په خبرو-اترو کې بايد هغه اړخونه شامل وي چې د بشري حقونو، ډيموکراټيکو ارزښتونو او د څنډې ته کړل شويو ټولنو حقونو په ځانګړې توګه د ښځو او نجونو د حقونو ملاتړ ته ژمن وي».
په دې ليک کې راغلي چې «د دې اصولو په فاحش نقض کې د طالبانو مخينه له پامه نشي غورځول کېدلای».
د دې ليک لاسليکوونکو ټيڼګار کړی چې له طالبانو سره هر ډول خبرې بايد د بشري حقونو او نورو حياتي موضوعاتو د رعايتولو له مخکيني شرط پرته ونشي.
دوی زياته کړې ده چې «يوازې د همداسې شرايطو په پوره کېدو کولای شو له يوې داسې ډلې سره خبره وکړو چې د افغانستان د بېلابېلو سياسي، قومي او مذهبي اړخونو استازولي کوي او د ښځو حضور پکې له ۳۰ څخه تر ۵۰ سلنې وي.»
د دې ليک لاسليکوونکو د جرمني له دولت او د اروپا له پارلمان څخه غوښتنه کړې ده چې له طالبانو سره د خبرو د وړاندينيو شرطونو له پوره کېدو پرته دې، پر دې ډلې د سفر تحريمونه رعايت کړي.
تر اوسه د جرمني دولت او نورو سرچينو اروپا او جرمني هيواد ته د طالبانو د غړو د سفر په اړه څه نه دې ويلي.
د دې فعالانو له لوري چې کوم ليک خپور شوی دی، اروپا ته د طالبانو د غړو د سفر دقيقه نېټه پکې نه ده ښوول شوې.
