وروسته له هغه چې د طالبانو حکومت په ټول هیواد کې د کوکنارو پر کښت، پېر او پلور بندیز ولګاوه ارزګان کې یو شمیر کروندګرو بدیلو کښتونو ته مخه کړه چې دا مهال د ډیری کرونګرو پام د انځرو باغونو جوړیدو ته اوښتی دی.
په دغه ولايت کې ميشت کروندګر وايي، چې انځر ښه حاصل ورکوي قيمتونه يې لوړ او د دوی اقتصادي اړتیاوې پوره کولای شي.
د ارزګان په مرکز ترينکوټ کې د «ديک» سيمې يوتن ګروندګر شمس الله وايي، چې په لس جریبه ځمکه د انځرو جوړ شوی باغ یې حاصل ته رسیدلی او هېله مند دی چې کړي مصارف به یې پوره کړي. دی زیاتوي چې نه یوازې ده بلکې دغلته ډیری کروندګرو په خپلو ځمکو د انځرو باغونو جوړ کړي دي.
شمس الله وویل: «د دې انځرو ښې پاکې پیسې دي د نورو حرامو کښتونو په پرتله برکت لري زه د ټولو خلکو څخه دا غواړم چې باید د نورو کښتونو پر ځای د انځرو باغونو ته مخ مه کړي يو من انځر په ۱۶ زره افغانۍ پلورل کيږي.»
يو بل کروندګر کريم الله هم د خپل انځرو له حاصلاتو څخه خوښ ښکاري او په وينا يې چې سږکال په ارزګان ولايت کې په سلګونه کسان د انځرو په کاروبار بوخت دي.
نوموړی زیاتوي: «سږکال ښه انځر شوي دي ښه حاصلات يې ورکړی دی يوازې زه نه بلکې ډير خلک سږکال د انځرو په کاروبار بوخت دي انځر يو قيمتي بوټی دی د بل هر شي په پرتله يې ګټه وټه زياته ده ټول خلک باید په خپلو ځمکو کې د انځرو کرنه وکړي.»
ارزګان کې نه يوازې باغ لرونکي د خپلو بڼونو څخه عايد ترلاسه کوي بلکې ګڼ شمير نور بې روزګاره ځوانان هم دغلته د انځرو د باغونو په ساتلو او د حاصلاتو په راټولولو بوخت دي چې له همدې لارې خپلې ورځنۍ اقتصادي اړتیاوې پوره کوي.
فرید احمد چې د دغه ولایت په مرکز ترینکوټ کې د انځرو په یوه باغ کې مزدوري کوي وایي، پخوا یې د نشه یې توکو د راټولولو په برخه کې مزدوري کوله چې خواري ډیره او ګټه یې کمه وه.
فرید وویل: «زه د پيسو په مقابل کې دلته کار کوم د مياشتې ۱۰ زره افغانۍ راته راکوي دا ډير ښه کار دی پر خپل کور راته روزانه پیداکېږي موږ ډير خوشحاله يو.»
یو شمیر نور کاریګر بیا وایي، پخوا بې کاره وو، خو اوس چې انځر حاصل ته رسیدلي نو دوی هم ورسره په کار شوي او خپلې کورنۍ ته یوه مړۍ ډوډۍ پیدا کولای شي. دوی د ځمکه لرونکو خلکو څخه غوښته کوي چې په خپلو ځمکو د انځرو باغونه جوړ کړي ترڅو حاصلات ډیر او ترڅنګ یې بې کاره ځوانان ورسره په کار بوخت شي.
دغه راز ارزګان ولایت کې د طالبانو دکرنې رياست مسوولين وايي، چې د نورو کلونو په پرتله دغلته د انځرو باغونه مخ په زیاتیدو دي، چې ورسره سږکال د انځرو په حاصلاتو ۱۵سلنه زیاتوالی راغلی دی.
ارزګان کې د کرنۍ او مالدارۍ ریاست لپاره د طالبانو مطبوعاتي مسوول عبدالمنان فاروقي وویل: «سږکال په ارزګان ولايت کې موږ د انځرو ښه حاصلات لرو د تېرکال په پرتله ۱۵ سلنه زياتوالی راغلی، تېرکال زموږ انځر ۲۸۰۷ ټنه و، سږکال ۳۲۲۸ ټنو ته رسیدلي دي.»
په ارزګان ولايت کې داسې مهال د انځرو حاصلات ډیر شوي چې سږکال د هېواد په سویلي ولايتونو کې د ۴.۵ کيلو انځرو قيمت تر ۴۰۰۰ افغانيو پورې رسيږي.
