اطلاعات روز: د ملګرو ملتونو د اته اويايمې عمومي غونډې په څنډه کې د افغانستان د ښځو او نجونو د وضعيت ارزونې لپاره «له جنسيتي اپارتايډ سره د مبارزې» په نوم غونډه جوړه شوې.
دا غونډه چې پرون (جمعه، ۳۱ د وږي) جوړه شوې، د بشري حقونو لپاره د ملګرو ملتونو د ځانګړي راپورچي ريچارډ بېنټ په ګډون پکې د هيوادونو استازو او د بشري حقونو فعالانو برخه اخیستې وه.
په ملګرو ملتونو کې د افغانستان د استازولۍ سرپرست نصير احمد فايق د افغانستان په اړه د دې غونډې په پېل کې له ټولنې څخه د ښځو او نجونو د سيسټماټيک حذف او د هغوی د اساسي او انساني حقونو د نقض په اړه اندېښنه ښودلې ده.
نوموړي زياته کړې، چې پر ښځو او نجونو د طالبانو بنديزونه به د افغانستان پر ټولې ټولنې پراخې منفي اغيزې ولري.
فايق ويلي، دوه کاله کېږي چې طالبانو افغانستان «يرغمل» کړی او يو ټولنيز بشرپالی، اقتصادي او سياسي کړکېچ يې را پيدا کړی دی.
ده ټينګار کړی، ښځې او نجونې چې د ټولنې نيمه برخه جوړوي د طالبانو تر واکمنۍ لاندې په زياته کچه زيانمنې شوې دي او دا وضعيت تر جنسيتي اپارتايډ کم څه نه دي او د نړيوالې ټولنې مشترک ارزښتونه ګواښي.
د افغانستان د استازولۍ سرپرست زياته کړې، چې د راپور ورکولو نورو ميکانيزمونو ته اړتيا ده، تر څو طالبان د بشريت پر خلاف د بشري حقونو د فاحش نقض په تړاو ځواب ووايي.
ده همدا راز له افغانستانه دباندې د ښځو په ګډون د پرمختګپالو او ډيموکراټيکو ځواکونو د ملاتړ غوښتنه کړې.
د بشري حقونو ځانګړي راپورچي ريچارډ بېنټ په خپلو خبرو کې ويلي، چې د جمهوريت پر مهال د ښځو اندېښنه د طالبانو بيرته راتګ و، خو اوس مهال تر ټولو لويه وېره د نړيوالې ټولنې له لوري په رسميت پېژندنه يا هم د وضعيت عادي کېدل دي.
ده زياته کړې، د افغانستان ښځې فکر کوي چې پرېښودل شوې دي او فکر کوي چې نړيوالې ټولنې ورسره خيانت کړی دی.
بېنټ همدا راز ويلي، چې د بشري حقونو شورا ته يې په خپلو راپورونو کې جنسيتي ځور او اذيت ته اشاره کړې ده.
د ښځينه حقونو فعالان اوس مهال په افغانستان کې وضعيت جنسيتي اپارتايډ بولي او له نړيوالې ټولنې يې د رسميت پېژندنې غوښتنه کوي.
