اطلاعات روز: د امريکا د پوځ مرکزي قومندانۍ له هغو ۲۲ امريکايي سرتېرو سره د مرکې کولو امر کړی چې د کابل پر هوايي ډګر کې د ځانمرګي بريد پر مهال موجود وو.
د آسوشيټيډ پريس له راپور سره سم، دا مرکې د هغه سرتېري د څرګندونو له کبله کېږي چې د کابل د هوايي ډګر په چاودنه کې ژوبل شوی و او ويلي يې و، چې له ده سره هيڅکله د دې بريد په اړه مرکه نه ده شوې.
دې سرتېري زياته کړې چې شونې وه او کولای يې شول چې د دې بريدګرو مخه ونيسي.
د مرکو موخه داده چې معلومه کړي کوم افراد په لومړيو څېړنو کې نه وو، نوي او متفاوت معلومات لري او که نه.
اسوشيټيډ پريس ليکلي، چې مرکې ښايي د ګانګرس د منتقدینو له لوري چې تر ډېره به جمهوري غوښتونکي وي، پر دې اساس ترسره کېږي چې دولت نه يوازې د وتلو بهير په ناسم ډول مديريت کړی بلکې د بريد په اړه يې ګډ-وډې څېړنې کړې دي.
د وژل شويو او ژوبل شويو يو شمېر کورنۍ هم شکايت کوي چې پينټاګون د هغې چاودنې په اړه په کافي اندازه شفافيت نه شي ورکولای چې ۱۷۰ افغانان او ۱۳ امريکايي سرتېري پکې ووژل شول.
د ۲۰۲۱ کال په نوامبر مياشت کې د متحده ايالاتو د مرکزي قومندانۍ د څېړنو پايلې دا شوې چې د کابل د هوايي ډګر په «ابي دروازه» کې افغان وګړو د تېښتې په موخه بيروبار جوړ کړی و، چې امنيتي وضعيت ورسره خراب شوی او له همدې کبله په تکتيکي کچه د دې بريد مخه نشوای نيول کېدلای.
دا بريد دوه کاله وړاندې د اګست مياشتې پر ۲۶مه نېټه د امريکايي او ناټو ځواکونو او له خطر سره د مخ افغانانو د تخليې په عملياتو کې وشو چې مسووليت يې داعش ډلې ومانه.
يو څه وخت وړاندې د کابل پر هوايي ډګر د بريد د کليزې پوره کېدو پر مهال د امريکا له فلوريډا ايالت څخه جمهوري غوښتونکي استازي کوري ميلز اعلان وکړ چې د دې هيواد د دفاع وزير لوويډ آسټين د استيضاح په اړه يې طرحه د متحده ايالاتو کانګرس ته لېږلې ده.
ښاغلي ميلز د امريکا دفاع وزير د دندې په ترسره کولو کې په «څرګنده نيمګړتيا» تورن کړی و.
د امريکا د کانګرس يوه بل استازي لورين بوبرټ هم پر ايکس خواله رسنۍ ليکلي، چې د دې هيواد د دفاع د وزير د استيضاح طرحې ملاتړ کوي.
ده زياته کړې: «باید له افغانستانه د شرموونکې وتنې په اړه ځواب ويونکی موجود وي چیرته چې سلګونو کسان او ۱۳ امريکايي سرتېري ووژل شول.»
