اطلاعات روز: لوګر ولايت کې د اليکترونيکي ازموينو مرکز پرانيستل شو، چې د مسولينو په خبره د ازموينو د روڼتيا په برخه کې اساسي رول لري.
د اداري اصلاحاتو او ملکي خدمتونو د دارالانشا رييس احمدضيا عبدالرحيمزی وايي چې د دې مرکز پر جوړېدو ۸ ميليونه افغانۍ لګښت راغلي، چې د يادې ادارې له بوديجې ورکړل شوې دي.
عبدالرحيمزي وويل چې په دې مرکز کې ۳۰ کمپيوټرونه، ۱۱۰ کيلو واټه جنراتور، ۱۲ ام بي متواتر انټرنېټ، انځوريز تليفوني اسانتيا، د کنټرول خونې سيسټم او ځينې نورې اسانتياوې شاملې دي.
نوموړي زياته کړه چې دا ځای به د لوګر خلکو ته د خدماتونو وړاندې کولو ښه مرکز وي او دوی هڅه کوي چې په لاس کې شته ټولې اسانتياوې خلکو ته ورکړي.
احمدضيا عبدالرحيمزي وويل: «دا په هېواد کې د اليکترونيکي ازموينو ۱۱م مرکز دی، لس مو مخکې جوړ کړي او دا لړۍ به دوام ولري. د افغانستان اسلامي جمهوريت خپلو خلکو ته د اسانتياوو او پرمختګونو د فرصتونو برابروونکی دی او موږ به په پوره ژمنتيا مخکې ځو.»
د لوګر والي عبدالقيوم رحيمي د دې مرکز پرانيستل مهم بولي او ټينګار کوي چې له دې سره به د ازموينو د شفافيت په برخه کې شته ستونزې له منځه يوسي.
رحيمي په دې ولايت کې د اسان خدمت او ځينو نورو اړينو ادارو د خدمتونو پيل پر پيل هم ټينګار وکړ او له مرکزي مسولينو يې په دې برخه کې د پاملرنې غوښتنه وکړه.
هغه زياته کړه: «پر کارونو د مستحقو کسانو ګمارنه هم اړتيا ده او هم د هغو کسانو حق دی، د داسې مهمو مرکزونو په پرانيستل کېدو به نور داسې مشکل نه وي چې د چا حق پايمال شي. له هغو ادارو زما جدي غوښتنه دا ده چې لوګر ته پام وکړي او سهم ورکړي، چې تر اوسه دلته فعاليت نلري.»
د لوګر اوسېدونکي د دې مرکز په پرانيستل کېدو خوښ دي او وايي چې د پروسو په ډيجيټل کېدو يې روڼتيا تر ډېره تضمينيږي او د ټولو هغو پروسو برېښنايي کول ګټور بولي، چې ستونزې پکې موجودې دي.
د پُل علم اوسېدونکی جان محمد لېوال وايي چې په ازموينو کې ستونزې زياتې دي او ډېر وخت د پيسو، واسطو، جعل او له نورو لارو نامستحق کسان بريالي او وړ کسان پاتې کېدل.
لېوال وويل: «ډېر داسې تکړه کسان و، چې څوک به يې نه لرل، اصلا يې په امتحان يې ګډون هم نه کاوه، ويل يې هسې هم نه کاميابيږي، ټوله پيسه او واسطه ده، مطلب دومره زړه ماتي شوي و. د دې مرکز په پرانيستل کېدو مړاوې هيلې بېرته راژوندۍ شوې.»
د قراردادونو د ورکړې، د شرکتونو د چارو روڼتيا او د ځينو دولتي او ډېری ودانيزو چارو د پروسو روڼتيا نورې هغه غوښتنې دي، چې خلک پرې ټينګار کوي.
