اطلاعات روز: د مسلمانو علماوو پلاوي د طالبانو د پوهنې او لوړو زده کړو له سرپرستو وزيرانو سره په خبرو کې ويلي، چې زده کړې د نر او ښځې لپاره يو «واجب اسلامي» امر دی.
د اسلامي همکاريو سازمان ويلي، چې دې پلاوي له طالب چارواکو سره په خبرو کې ټولو تحصيلي کچو او هغو تخصصي څانګو ته چې افغانان ورته اړتيا لري د نجونو او هلکانو د لاسرسي پر اړتیا ټينګار کړی دی.
د اسلامي همکاريو د سازمان په اعلاميه کې راغلي: «په دې ليدنو کې دواړو اړخونو ټينګار وکړ چې زده کړې د امت د علماوو په اجماع د ښځې او نر لپاره يو واجب اسلامي [امر] دی.»
د اسلامي همکاريو د سازمان له اعلاميې سره سم، د مسلمانو علماوو پلاوي د درسي برنامو د بيا کتنې او په ټول هيواد کې د نجونو لپاره د امن زدکړييز چاپېريال د را منځته کولو په تړاو د طالبانو د پوهنې او لوړو زده کړو وزارتونو راپور هم اورېدلی دی.
همدا راز د اسلامي همکاريو سازمان زياته کړې چې د افغانستان په چارو کې د دې سازمان د عمومي منشي استازي د طالبانو د بهرنيو چارو وزارت له سرپرست امير خان متقي سره افغانستان ته د مسلمانو علماوو د پلاوي د سفر پر پايلو غږېدلی دی.
د دې سازمان له اعلاميې سره سم، مسلمانو علماوو د سازمان لپاره د مهمو موضوعاتو «لکه په اسلام کې زغم، د نجونو زده کړې او د ښځو د کار» په تړاو د طالبانو له علماوو او چارواکو سره ګڼې غونډې کړې دي.
طالبانو پر افغانستان تر واکمنېدو وروسته د ښځو او نجونو په ګډون د هيواد پر وګړو سخت بنديزونه لګولي دي. اوس مهال ښځې او نجونې له زده کړو او کار کولو څخه بې برخې دي.
طالبانو لومړی ويل چې د نجونو زده کړې تر امر ثاني پورې منع شوې دي او دا بنديز لنډمهالی دی. د دې ډلې چارواکو بيا-بيا اعلان کړی چې د نجونو پر وړاندې د ښوونځيو او پوهنتونونو د پرانيستې پر طرحې کار روان دی، خو د دوو کلونو تر تېرېدو وروسته لا هم روښانه نه ده چې دا کار چيرته رسيدلی او څه وخت به وروستی کېږي؟
له بله اړخه، د تېرو دوو کلونو پر مهال پر ښځو او نجونو د طالبانو بنديزونه نه يوازې دا چې کم شوي نه دي، بلکې ورځ تر بلې زياتېږي.
