اطلاعات روز: د ستورپوهنې خصوصي ټولنه «کيهانه» وایي، چې د افغانستان په استازولۍ يې په پولينډ کې د ستورپوهنې او اسټرو فزیک (lOAA) په شپاړسم المپياد کې ګډون کړی او طرحې يې لومړنی مقام ګټلی دی. د دې علمي ټولنې پر فيسبوک پاڼه ليکل شوي چې د بهترينو «پوسټرونو» جايزه د افغانستان او قبرس لوبډلو تر لاسه کړې ده.
کيهانه ټولنې پر خپلې فېسبوک پاڼې یوه پیغام کې ليکلي، چې افغانستان په لومړي ځل د ستورپوهنې او اسټرو فزيک په نړيوال المپياد کې ګډون کړی دی.
کيهانه ليکلي: «په خوشحالۍ اعلان کوو چې په دې المپياد کې د افغانستان د المپياد ډلې طرحې لومړی [مقام] ګټلی دی.»
د کيهانه ټولنې په وينا، د افغانستان طرحې د ۵۳ هيوادونو تر منځ زياتې رايې وړې دي. دې ټولنې د خپلې طرحې په اړه وضاحت نه دی ورکړی.
د ستورپوهنې او اسټرو فزيک شپاړسم نړيوال المپياد په خپله اعلاميه کې ويلي، چې د المپيک د تر ټولو غوره «پوسټرونو» جايزه د افغانستان او قبرس لوبډلو ته ورکړل شوې ده.
په همدې حال کې کيهانه ټولنه وايي، چې د افغانستان المپياد لوبډلې غړو ته د پولينډ له لوري ويزه نه ده ورکړل شوې او نه دي توانېدلي چې په IOAA ازموينه کې ګډون وکړي.
د کيهانه په وينا، يوازې آمېنه کريميان چې د دې ټولنې له مشرانو څخه ده د ستورپوهنې او اسټروفزيک په المپياد کې د افغانستان استازولي کړې ده.
دې ټولنې د افغانستان المپياد لوبډلې غړو ته د ويزې د نه ورکړې لامل «سياسي ملاحظات» ګڼلي.
