اطلاعات روز: ننګرهار کې د پوهنتون استادانو د طالبانو د کورنیو چارو له سرپرست وزیر سراج الدین حقاني سره په لیدنه کې د افغان نجونو پر مخ د ښوونځیو او پوهنتونونو د پرانیستلو غوښتنه کړې.
د طالبانو د کورنیو چارو له وزارت څخه نن (یکشنبه، ۱۵ د زمري) په خپره شوې خبرپاڼه کې راغلي، چې سراج الدین حقاني ننګرهار ته د خپل سفر په ترڅ کې د پوهنتون له استادانو، علماوو او قومي مشرانو سره کتلي دي.
په دې لیدنه کې د خصوصي پوهنتونونو په استازولۍ احمد طارق ویلي، افغانان باید مجبور نه شي چې خپلې لوڼې او خویندې پردي چاپیریال ته یوسي او هلته پرې زده کړې وکړي.
هغه دغه راز زیاته کړې د طالبانو حکومت ته په کار ده، چې اوس په دې برخه کې خپل مسوولیت ادا کړي.
دغه راز د طالبانو د کورنیو چارو سرپرست دې ناستې ته په وینا کې ننګرهار د علم او کلتور کور او ادرس بللی او زیاته کړې یې ده چې ستونزې او نیمګړتیاوې شته، خو په خبره یې چې په صبر او حوصله به یې د له منځه تلو په موخه ګډ کار کوي.
په ورته مهال افغان نجونې هم د طالبانو له حکومت غواړي چې د دوی پر مخ دې تړلي ښوونځي او پوهنتونونه پرانیزي.
د دوی په خبره که د طالبانو حکومت ورته د زدهکړو زمینه برابره کړي، وبه کولای شي خپلې ټولنې ته خدمت وکړي.
له طالب چارواکو دا غوښتنې داسې مهال کیږي، چې له دې څه موده وړاندې په ننګرهار کې دخصوصي پوهنتونونو او انسټیټونو اتحادیې ویلي و، که سږکال د نجونو ته له شپږم ټولګي د پورته زده کړو اجازه ورنه کړل شي نو د دوی تحصلي مرکزونه به د سقوط له ګواښ سره مخ شي.
