اطلاعات روز: په افغانستان کې د اروپايي ټولنې استازولۍ اعلان کړی چې د خوراکي توکو د نه خوندیتوب سره د مبارزې په موخه يې له افغانستان سره د يوې زراعتي پروژې له لارې ۷.۶ ميليونه يورو مرسته کړې ده.
د اروپايي ټولنې د اعلاميې له مخې چې نن (پنجشنبه، ۲۹ د چنګاښ) يې خپره کړې، دا پروژه د «افغان ايډ» په نوم بنسټ له لوري په بدخشان، دايکندي، غور، جوزجان، سمنګان او تخار ولايتونو کې عملي کېږي.
د اروپايي ټولنې د استازولۍ په اعلاميه کې راغلي، چې په دې پروژه کې د بزګرانو د ملاتړ، د غذايي موادو د توليد د ښه کولو او للمي ځمکو د بيا ژوندي کولو له لارې د غذايي ناامنۍ هغو اندېښمنوونکو کچو ته رسيدګي کېږي چې زيانمنونکې برخې يې اغېزمنې کړې دي.
په دې اعلاميه کې راغلي، چې په افغانستان کې ۱۷.۲ ميليونه وګړي له سختې ناامنۍ کړېږي او همدا راز دا هيواد د اقليمي بدلونونو له وجې تر ټولو ډېر زيانمنېدونکی هيواد دی.
په افغانستان کې د اروپايي ټولنې د استازولۍ سرپرستې رافائيلا اديس ويلي، چې دا ټولنه او شريکان يې اصولي چلند ته ژمن دي او ډاډ تر لاسه کوي چې ښځې او نارينه په پروژو کې ګډون کوي او ترې ګټه ترلاسه کړي.
دې زياته کړې، چې اروپايي ټولنه ژمنه ده چې د افغانستان له خلکو په ځانګړې توګه په محلي ټولنه کې له هغو کورنيو سره چې مشري يې ښځې کوي او خپلې اړتياوې نشي پوره کولای، مرسته وکړي.
د «افغان ايډ» موسېسې بنسټګر چارلز ډيوي ويلي، چې د افغانستان ډېری وګړي کافي خوړو ته لاسرسی نه لري، ډېره مهمه ده چې د زيانمنونکو وګړو د ملاتړ په موخه د زيات غذايي توليد او د هغوی د عايد د زياتوالي په برخه کې نور اقدامات وشي.
د طالبانو تر واکمنېدو وروسته افغانستان له اقتصادي کړکېچ سره مخ دی او اوس مهال په هيواد کې ۲۸.۸ ميليونه وګړي بشري مرستو ته اړتيا لري.
پراخ اقتصادي کړکېچ د هيواد د وګړو تر منځ په بېلابېلو کچو غذايي ناامني زياته کړې ده.
