اطلاعات روز: د پاکستان دفاع وزير خواجه محمد آصف ويلي، چې دا هيواد په افغانستان کې د طالبانو دريځ ته له پام پرته د تروريزم جرړو ايستلو ته ژمن دی.
نوموړي دا څرګندونې د طالبانو د وياند ذبيح الله مجاهد د خبرو په ځواب کې کړې دي. په رسنيو کې مجاهد ته په منسوبو خبرو کې ويل شوي چې طالبانو له امريکا سره د دوحې هوکړه ليک لاسليک کړی او له پاکستان سره به بېل چلند کوي.
د ټويټر يوه کاروونکي ليکلي، چې د طالبانو دا دريځ په دې معنا دی چې دغه ډله د دوحې د هوکړه ليک له مخې مکلف ده چې يو شمېر اورپکي مهار کړي، نه ټول؟
خواجه محمد آصف دا ټويټ بيا خپور کړی او ورسره ليکلي یې دي چې «د افغانستان دريځ ته له پام پرته، پاکستان له خپلې خاورې د تروريزم د جرړې په ايستلو کې ژمن دی، که له هرې سرچينې وي.»
ده ټينګار کړی، چې پاکستان به د کابل دريځ ته له پام پرته چې په خپلو پولو کې دننه د اورپکو د مهارولو اراده لري او که نه، له تروريزم سره مبارزه وکړي.
خواجه محمد آصف وړاندې په افغانستان کې د تحريک طالبان پاکستان (ټي ټي پي) د غړو د شتون له ادعا سره ويلي و چې د افغانستان طالبان د دوحې تړون ته ژمن نه دي.
ده په يوه ټويټ کې ليکلي و، چې طالبان نه د ګاونډيتوب او نه هم د ورورولۍ حق ادا کوي او نه هم د دوحې تړون ته ژمن دي.
ده زياته کړې وه: «له تېرو ۴۰ – ۵۰ کلونو راهيسي له ۵۰ لکو څخه تر ۶۰ لکو افغان وګړي د کډوالۍ د ټولو حقونو په درلودلو په پاکستان کې اوسي، خو برعکس کوم تروريستان چې د پاکستانيانو وينې بهوي، کولای شي د افغانستان په خاوره کې پناه واخلي.»
په پاکستان کې تر وروستيو بريدونو وروسته، د دې هيواد پوځ هم «په پاکستان کې په تروريستي اقداماتو کې د افغان وګړو د ښکېلتيا» له وجې خبرداری ورکړی دی.
د پاکستان د پوځ اعلاميه چې د تېرې جمعې په ورځ خپره شوه، پکې ويل شوي چې هيواد يې په افغانستان کې د پاکستاني طالبانو (ټي ټي پي) د غړو د پناه ځايونو او ازاد تګ-راتګ په تړاو جدي اندېښنې لري.
