اطلاعات روز: خوست کې د وروستیو سېلابونو له امله د دغه ولایت په مرکز او ځینو ولسوالیو کې د ګڼو مالي زیانونو سربېره دوه کسان مړه شوي او درې نور ټپیان دي.
په خوست ولایت کې طبیعي پېښو ته د رسېدو ریاست طالب مسوولین وايي، د تېرو دوو ورځو راهیسې د سېلابونو له امله یو ماشوم مړ شوی او درې نور کسان ټپیان شوي دي.
په دغه ولایت کې پېښو ته د رسېدو طالب امر کلیم ګل محلي رسنیو ته ویلي، چې د ورښتونو او سیلابونو په مرکز، ګربزو ولسوالۍ او ځینو نورو سیمو کې د خلکو ۲۵ کورونه نړولي او په خبره یې چې د بزګرانو پراخه کرنیزې ځمکې یې هم له منځه وړي دي.
خوست کې یوې بلې ځايي سرچینې بیا اطلاعات روز ته وویل، چې په ګربزو ولسوالۍ کې یو ۳۰ کلن ځوان د سېلاب اوبو راوړی خو هویت یې نه دی معلوم چې نوموړی د کومې سیمې اوسېدونکی دی.
په همدې حال کې بیا د خوست ولایت د ګربزو ولسوالۍ یوه اوسیدونکي اطلاعات روز سره په خبرو کې وویل، چې د ګربزو ولسوالۍ اړوند په بوریخېلو سیمه کې خلکو ته ګڼ مالي زیانونه رسېدلي او اوس بېړنیو مرستو ته اړتیا لري.
د خوست ترڅنګ په پکتیا او پکتیکا ولایتونو کې هم سېلابونو زیانونه اړولي دي، د یادو ولایتونو طالب مسوولینو ویلي، چې دغه سېلابونه ځاني زیان نه لري خو د کرنیزو ځمکو سربېره د خلکو د استوګنې کورونه، د ښوونځیو او د دیني مدرسو ودانۍ تخریب شوې دي.
