اطلاعات روز: کونړ کې د پخواني نظام یو سرتېری شکایت کوي، چې د تېر جمهوري حکومت له پرځېدو وروسته او واک ته د طالبانو له رسېدو سره سم یې د معلولیت حقوق ځنډول شوي او له تېرو دوو کالو را هیسې یې د معلولیت هېڅ ډول امتیاز نه دی ترلاسه کړی.
دی وايي، د طالبانو له لوري پر معلولو سرتېرو د امتیازاتو له قطع کېدو وروسته ټول له سختو اقتصادي ستونزو سره لاس او ګرېوان دي، چې له امله یې د دوی د ژوند چارې ټکنۍ شوې دي.
د کونړ د چپې درې ولسوالۍ اوسېدونکی شفیع الله چې د پخواني جمهوري نظام پرمهال یې د هېواد په بېلابېلو ولایتونو کې پوځي دندې ترسره کړي او د کندهار په پنجوايي ولسوالۍ کې یې د یوه ځای پرځای شوي ماین په چاودنه کې یوه پښه له لاسه ورکړې، اوس مهال له سختو اقتصادي ستونزو کړېږي.
نوموړی وايي، تېر حکومت کې د معلولیت له نسبي حقوقو برخمن و، خو د طالبانو په واکمنۍ کې له خپلو ټولو حقونو بې برخې شوی او د طالبانو نظام یې غږ ته هېڅ ډول پاملرنه نه ده کړې.
دغه معلول سرتېری وايي: «دا دولت مونږ ته هغه سل فیصدو کې لس فیصده هم نه را کوي، نو مونږ به بچیان په څه شي وساتو.»
نوموړی اوس مهال په معلول ځان د چپې درې ولسوالۍ په یوه کان کې د کان کیندونکو له وسایلو ساتنه کوي.
شفیع الله وايي، ډېرې ناچارۍ او د کورنۍ اقتصادي کړکېچ یې د یوازېني کوچني زوی د روښانه راتلوونکي مخه نیولې او د لوږې پر وړاندې د نسبي مبارزې لپاره یې له خپل ځان سره کوچنی زوی، چې دا وخت یې د زده کړو دی هم په درنو کارونو لګیا کړی.
نوموړی زیاتوي، که زوی یې له هغه سره د کار پرځای د ښوونځي پر لور قدم پورته کړي د ژوند له سختو او ترخو ورځو ـ شپو سره به مخامخ شي.
دغه معلول سرتېري وویل: « د زوی مې تعلیم د بې وسۍ، مجبورۍ او غریبۍ نه پاتې دی، که هغه ماته غریبي ونه کړي، زمونږ حالات خراب دي، ماښام ته څه شی نشته، مجبوره یم بچي ته ووایم چې بچیه، چې د ولږې مرو تعلیم نه تېر شه.»
د تېر پرځېدلي جمهوري نظام دغه معلول سرتېری د طالبانو پر حکومت او اړوندو کورنیو او بهرنیو مرستندویه بسنټونو غږ کوي، چې د نوموړي د شته اقتصادي ستونزو د حل او د هغه د اولادونو د روښانه راتلوونکي په موخه یې دایمي اقتصادي ملاتړ وکړي.
بل لور ته کونړ کې د طالبانو سیمه ییز چارواکي نه مني، چې ګواکې د تېر جمهوري نظام معلولین دې یې له پامه غورځولي وي.
په دې ولایت کې د شهیدانو او معلولینو چارو طالب رییس مولوي عبیدالله وايي، له ټولو معلولینو سره په یو ډول چلند کېږي او هڅه کوي، چې د ټولو معلولینو د حقونو ورکړې ته رسېدنه وکړي.
دغه طالب چارواکي زیاته کړه: «مونږ ته ټول معلولین یو شان دي او د دوی لپاره دغه ریاست جوړ دی، وزارت جوړ شوی دی او خدمت کېږي، مونږ ته چې کوم معلولین د تېر نظام دي او که زمونږ دي دا ټول یوشان معلولین دي او ټولو ته به حق ورکول کېږي.»
کونړ کې د طالبانو ځايي چارواکي په داسې حال کې د معلولینو د ستونزو د حل ژمنې کوي، چې ولسي خلک د دغې ډلې له لوري د ژمنو پر عمل بې باوره شوي.
ځايي خلک وايي، واک ته د طالبانو له رسېدو وروسته دې ډلې په بېلابېلو برخو کې د ستونزو د حل مکررې ژمنې کړي، خو تر اوسه د طالبانو سرپرست حکومت په ډېر شمېر مواردو کې د ژمنو په عمل کې پاتې راغلي دي.
کونړ مېشتي له طالبانو غوښتنه کوي، چې نور دې د ولسونو د تېر ویستلو پرځای د خلکو د ستونزو حل په موخه رښتیني ګامونه پورته کړي.
