اطلاعات روز: د طالبانو د پوهنې وزارت اعلان کړی چې د دې ډلې مشر هبت الله آخوندزاده د ديني مدرسو لپاره ۱۰۰ زره کاري بستونه منظور کړي دي.
د طالبانو د پوهنې وزارت له اعلاميې سره سم، د دې وزارت سرپرست حبيب الله آغا دا خبر نن (شنبه، ۳ د چنګاښ) نورستان ولايت ته د خپل سفر پر مهال اعلان کړی دی.
نوموړي په نورستان کې ځايي خلکو او ځايي طالب مسوولينو ته د يوې غونډې پر مهال ويلي، چې د هيواد د نورو ولايتونو په پرتله دې ولايت ته زيات بستونه په پام کې نيول شوي دي.
د طالبانو د پوهنې وزارت د تېر لمريز کال په غويي مياشت کې اعلان وکړ چې په هر ولايت کې يوه ديني مدرسه جوړوي چې د زرو نفرو ظرفيت به لري او همدا راز په هره ولسوالۍ کې له دریو څخه تر ۱۰ پورې ديني مدرسې جوړوي.
دې ډلې له هغه وخته تر اوسه د پنجشېر په ګډون په بېلابېلو ولايتونو کې د لويو جهادي او ديني مدرسو د جوړولو خبر ورکړی دی.
د طالبانو مشر په داسې حال کې ديني مدرسو ته ۱۰۰ زره کاري بستونه ځانګړي کړي چې پر هيواد د دې ډلې له واکمنېدو راهيسې، د نجونو منځني ښوونځي او لېسې تړلي دي او ښځينه محصلينې پوهنتونو ته له تللو هم راګرزول شوې دي.
