اطلاعات روز: هلمند کې باوري سرچینې وایي، چې په دغه ولایت کې د طالبانو او له دوی سره د جنایي بندیانو ترمنځ په نښته کې یو طالب او یو بندي وژل شوي او د یو بندي په ګډون ۴ طالبان ټپیان دي.
یوې ځايی سرچینې د نوم نه یادولو په شرط اطلاعات روز ته وويل، چې دغه نښته تېره ورځ (چهارشنبه، ۳۱ د غبرګولي) د هلمند ولايت په امنيې قومندانۍ کې رامنځته شوې ده.
سرچینه زیاتوي، چې پیښه هغه مهال رامنځته شوې د ماښام د لمانځه پرمهال د طالبانو وسلې د بندیانو پر لاس ورغلي او پر طالب لمونځ کوونکو یې ډزې پېل کړي دي.
د ده په خبره، چې تر یوه ساعت نښتې وروسته یو طالب او یو بندي وژل شوي او درې طالبان او یو بندي ټپیان دي.
یوه بله سرچینه بیا وایي، چې یو طالب او دوه بندیان وژل شوي او ۳ طالبان ټپیان دي.
یو لنډ ویډیویي کلیپ چې پر خواله رسنیو خپور شوی پکې طالبان غږ کوي او وایي، چې یاد کسانو ته چا وسلې په لاس ورکړي دي.
سرچینې وویل، چې طالبان دغه بندیان داعش سره په همکارۍ تورنوي.
هلمند کې د طالبانو امنیتي مسوولینو تراوسه په دې اړه څه نه دي ویلي.
طالبانو د هېواد په بېلابېلو ولايتونو کې يو شمير کسان د داعش او د «مقاومت جهبې» سره د همکارۍ په تور نيولي او په زندانونو کې یې ساتي.
