اطلاعات روز: د ډلهييز امنيتي تړون سازمان د بهرنيو چارو وزيرانو د افغانستان د وضعيت په اړه د يوې ګډې اعلاميې په خپرولو سره غوښتنه کړې چې په افغانستان کې دې د «نفوسو د جبري ځای پر ځای کېدو» مخنیوی وشي.
دا اعلاميه پرون (سېشنبه، ۳۰ د غبرګولي) په منسک کې د ډلهييز امنيتي تړون د سازمان د غړو هيوادونو د بهرنيو چارو وزیرانو تر غونډې وروسته خپره شوې ده.
په دې اعلاميه کې راغلي: «موږ د قومي ډلو د حقونو او اساسي ازاديو د مراعتېدو غوښتونکي يو؛ په دې لړ کې بايد [د هغوی] د ازار او ځورونې مخنیوی وشي او د هغوی په دايمي مېشتځايونو کې بايد د نژاد او مذهب پر اساس په جبري توګه نفوس ځای پر ځای نشي.»
د ډلهييز امنيتي تړون سازمان د غړو هيوادونو د بهرنيو چارو وزيرانو په دې اعلاميه کې ټينګار کړی چې طالب چارواکي دې د بشر حقونو اساسي اصولو ته د درناوي له ژمنې سره سم د ښځو او نجونو حقونه په ځانګړې توګه نجونو ته د زده کړې حق [ورکړي].
دوی په افغانستان کې د امنيتي وضعيت د خرابېدو او د نړيوالو تروريستي ډلو د فعاليتونو د زياتېدو په ځانګړې توګه د داعش خراسان ډلې په اړه اندېښنه ښودلې ده.
د دې سازمان د غړو هيوادونو د بهرنيو چارو وزيرانو له طالبانو غوښتي چې د تروريزم ضد اقدامات دې سخت کړي او نه دې پرېږدي چې افغانستان د تروريزم په مرکز بدل شي.
دوی په خپله اعلاميه کې په افغانستان کې د نشهيي توکو د قاچاق د زياتېدو او ګاونډيو هيوادونو ته د يې د پراخېدو په اړه اندېښنه ښودلې او د نشهيي توکو د ختمېدو لپاره يې د طالبانو د ژمنو پر عملي کېدو ټينګار کړی دی.
د ډلهييز امنيتي تړون سازمان د غړو هيوادونو د بهرنيو چارو وزيرانو له طالبانو د افغانستان د سياسي او قومي ډلو له مشرانو غوښتي چې د ټولشموله حکومت د جوړولو لپاره دې رغنده خبرې وکړي.
دوی دغه راز د دغه سازمان د غړو هېوادونو د سویلی پولو د سولې او ثبات د ټینګښت په ګډون د سیمې لپاره د افغانستان له خوا له رامنځته شویو امنیتي ګواښونو سره د مبارزې په برخه کې خپل چمتووالی اعلان کړی او ويلي يې دي چې د افغانستان او تاجکستان د پولې پر يو شمېر برخو د امنيتي تدابيرو د زياتولو ملاتړي دي.
د ډلهييز امنيتي تړون سازمان تر دې وړاندې هم په افغانستان کې د داعش په شمول د تروريستي ډلو د شتون په اړه اندېښنه ښودلې وه.
خو دا لومړی ځل دی چې د دې سازمان په اعلاميه کې د «نفوسو د جبري ځای پر ځای کېدنې» يادونه کېږي.
دا اعلاميه په داسې حال کې خپرېږي چې په دې وروستيو اونيو کې داسې راپورونه خپاره شوي وو چې د پاکستاني طالبانو د خوځښت «ټي ټي پي» غړي د هيواد په شمالي ولايتونو کې ځای پر ځای کېږي.
طالبانو منلې ده چې «وزيرستاني کډوال» د افغانستان په سویلي، مرکزي او شمالي سيمو کې ځای پر ځای کوي.
