اطلاعات روز: د طالبانو د عامې روغتیا وزارت د ارزګان په دهراوود ولسوالۍ کې د هغې کورنۍ د ۱۲۰ غړو درملنه پېل کړې چې پرلپسې درې نسله یې په سترګو معلول دي.
دغې کورنۍ څه موده وړاندې د اطلاعات روز سره په خبرو کې ویلي و، چې د سترګو د معلولیت له کبله ورسره نور خلک راشه درشه او خپلوي نه کوي چې د خپلمنځي خپلوي له امله د دوی نسل په دوامدار ډول معلول پیدا شوی دی.
دوی غوښتنه کړې وه چې واکمن حکومت دې د دوی مرستې ته ورسیږي ځکه په خبره یې چې په یوازې سر د دومره شمیر کسانو د درملنې وس نه لري.
اوس د یادو کسانو د درملنې لپاره د طالبانو د عامې روغتيا وزارت دغلته د سترګو د درملنې يو ټيم استولی ترڅو ټول په سترګو معلول کسان معاینه او درملنه یې وکړي.
د عامې روغتيا وزارت لپاره د طالبانو د سترګو د درملنې امر ډاکټر اغامحمد عابد توتاخيل وايي، چې د يو متخصص ټيم یې دهراوود د نابینایانو لپاره ليږلی ترڅو د ټولو عمليات په وړيا ډول ترسره کړي.
هغه وويل :«دا یو ارثي ستونزه ده د تداوي وړ او پردې یې عملیات کېږي.»
نوموړی زیاتوي، چې دوی دغه کورنۍ ته بېلابېلې لارښوونې کوي ترڅو یې پرمټ وکولای شي هغه ماشومان چې نوي زیږي له دې حالت وژغوري.
د توتاخیل په خبره: «د دغه کورنۍ لامل جینيټيکي تغيرات دي د دې لپاره باید د حمل په جريان کې معاينات ورته وشي او ترڅنګ يې تر دوه مياشتو پورې دوی باید خپل نوي زيږيدلي ماشومان د سترګو ډاکټر ته يوسي.»
ورته مهال هغه کسان چې د دوی غږ یې تر مسوولینو رسولی مننه کوي او وایي، چې لوی ارمان یې د سترګو جوړیدل دي، خو ډاکټران ژمنه کوي چې د ټولې کورنۍ سترګې به یې رغیږي.
یو تن نابینا جانيسا وویل: «د مرکزې حکومت لخوا څخه موږ ته يو ټيم راليږل شوی موږ ډير خوشاله يو چې په دهراوود ولسوالۍ کې دومره خدمت وړاندې کيږي موږ مننه ورڅخه کوو په دې کې رسنيو ښه پوره خپل رول ادا کړی موږ ترې ډير خوشاله يو.»
راليږل شوی مختصص ټيم بیا وايي، چې دوی د يادو کسانو تشخصص کوي هغه کسان چې دلته يې درملنه شونې ده همدلته يې درملنه کوي او هغه کسان چې درملنه یې دلته نه کېږي مرکز کابل ته يې انتقالوي.
