اطلاعات روز: د بښنې نړيوال سازمان د کډوالو د نړيوالې ورځې په مناسبت د پاکستان له دولت څخه غوښتي چې د پناهغوښتونکو خپلسرې نيونې او ځورونې دې ودروي.
نن (سېشنبه، ۳۰ د غبرګولي) د کډوالو له نړيوالې ورځې سره برابره ده.
د بښنې نړيوال سازمان د دې ورځې په مناسبت په يوه خپره کړې اعلاميه کې ويلي، چې د افغانستان وګړي په ۲۰۲۱ اګست کې پر دغه هيواد د طالبانو تر واکمنېدو وروسته پاکستان ته تښتېدلي دي، خو هلته له خپلسرو نيونو او د شړنې له ګواښ سره مخ دي.
په سويلي اسيا کې د بښنې د نړيوال سازمان سيمهييزې مديرې دينوشيکا ديساناياکه ويلي: «ډېر د انديښنې ځای دی چې په پاکستان کې د افغان کډوالو وضعيت ته نړيواله پاملرنه نه کېږي.»
د دې په وينا، افغان کډوال نشي کولای چې بيرته خپلو کورونو ته ولاړ شي او نه هم په پاکستان کې پاتېدلای شي.
دينوشيکا ديسانايکه زیاته کړې، چې مبهم حقوقي وضعيت او د پناه غوښتنې او ميشتېدنې لپاره سختو پروسو په پاکستان کې ډېری افغان کډوال اغېزمن کړي دي.
د بښنې نړيوال سازمان ويلي، چې له نهو کسانو سره چې شپږ يې په تېرو دريو مياشتو کې په پاکستان کې نيول شوي و، مرکې کړې دي.
يو شمېر کډوالو ويلي، چې دوی قانوني اسناد درلودل خو د پاکستاني پوليسو له لوري نيول شوي او جريمه شوي دي.
يوه کډوال حسن ويلي: «دوی پاسپورټ او د پيسو بټوه راڅخه واخيستل او بيا يې څو ځله زما بدن وپلټه. دوی حتا زه هم ونيولم چې وېزه مې درلوده او په قانوني ډول راغلی وم.»
له ويزې پرته په پاکستان کې د سيمکارټ موندل او د بانکي حساب جوړول هم د افغان کډوالو لپاره ستونزمن دي.
يوه کډوال ويلي: «که ويزه نه لرئ نو د مېشتېدو قانوني اجازه نشئ اخيستلای. له همدې امله بايد يوه دلال ته رشوت ورکړئ.»
د بښنې نړيوال سازمان د ملګرو ملتونو د کډوالو له عالي کميشنرۍ (UNHCR) څخه غوښتي چې په پاکستان کې د پناه غوښتونکو افغانانو د نومليکنې او غوښتنليکونو د ارزونې پروسه دې چټکه کړي.
دې سازمان د پاکستان له دولت څخه هم غوښتنه کړې چې د افغان کډوالو له خپلسرې نيونې او ځورونې دي لاس واخلي.
همدا راز د بښنې نړيوال سازمان له درېيمو هيوادونو هم غوښتي چې له کومو افغانانو سره يې د منلو ژمنه کړې، هغوی ته دې ژر تر ژره ويزې ورکړي.
په دې وروستيو کې په پاکستان کې د افغان کډوالو د نيول کېدو په تړاو ګڼ راپورونه خپاره شول.
پاکستان افغان اتباع هم اخراجوي او دا کار د هغو خلکو لپاره خطرناک کیدی شي چې د طالبانو له ویرې تښتیدلي دي.
