اطلاعات روز: ارزګان کې خلک شکایت کوي چې د دغه ولایت په ډیری روغتیایي مرکزونه کې د یو شمیر ناروغیو متخصص ډاکټران شتون نه لري چې له کبله یې د دوی سمه درملنه نه کېږي او د ګړاو سره مخ دي.
محمد نبي چې د ارزګان اوسیدونکی دی وايي، چې د ولایت او ولسوالیو په ډیری روغتیایي مرکزونو کې د هډوکو، سترګو او پوستکي په ګډون د ګڼو نورو ناروغيو متخصص ډاکټران شتون نه لري.
نوموړي وویل: «ارزګان ولايت کې ډاکټر نشته نه د هډو ډاکټر شته نه د سترګو د درملنې ډاکټر شته نه د جلدي ناروغيو ډاکټر شته زما په پښه کې سیخان بسته دي په ټول ولايت کې ډاکټر نشته چې دغه سيخان راوباسي زه مجبوره يم چې کندهار ته ولاړ شم.»
دی د طالبانو له حکومت غوښتنه کوي چې د دوی ستونزو ته دې پام وکړي.
د دې ولایت یو بل اوسیدونکی محمد شفیق هم له ورته ستونزې شکایت کوي او وایي، چې دغلته هیڅ د سترګو ناروغیو ډاکټر نشته دی.
ده وویل: «هيڅ ډاکټر نشته زما لور د سترګو ناروغي لري اوس یې کندهار ته وړم نه د سترګو نه د غوږو نه د هډوکو ډاکټر شته.»
نموړی او د ارزګان یو شمیر نور اوسیدونکي د طالبانو له حکومت غوښتنه کوي چې د دغه ولایت په روغتیایي مرکزونو کې دې د متخصص ډاکټرانو د کمښت ستونزه حل کړي ترڅو خلک خپله درملنه همدلته وکړي.
ځايي طالب مسوولين هم منې چې د يو شمير ناروغيو متخصص ډاکټران په روغتونو کې شتون نه لري.
د دې ولايت لپاره د طالبانو د عامې روغتيا ريیس ډاکټر محمدالله روحاني وايي، چې دامهال د ارزګان د روغتيايي مرکزونو تمويل په ټيټ درجه خدمتونو کې کېږي او کوښښ کوي ترڅو تمويل کوونکي موسېسې وهڅوي ترڅو دولتي روغتونونو ته د لوړي درجې امتياز ورکړي.
نوموړی وايي، چې دامهال یوازې ددې ولايت په مرکز او دهراوود ولسوالۍ کې دوه روغتيايي کلينکونه د نورو په پرتله مجهز دي.
دا په داسې حال کې ده چې تردې وړاندې د ارزګان اوسيدونکو د ښځينه ډاکټرانو د کمښت څخه هم شکايتونه کړي چې لا یې غوښتنې ته پام نه دی شوی.
