اطلاعات روز: د طالبانو له لوري د رسنيو د مالي ملاتړ تر ژمنې وروسته د افغانستان د ازادو رسنيو ملاتړي بنسټ (نی) ويلي، چې دا کار بايد د رسنيو خپلواکي تر سيوري لاندې رانه ولي.
د نی د اعلاميې له مخې، د طالبانو د اطلاعاتو او فرهنګ وزارت سرپرست په غزني ولايت کې له خبريالانو سره د يوې غونډې پر مهال ويلي، چې پر يوه داسې طرحه کار کوي چې رسنۍ دولتي مالي ملاتړ ولري.
نی ويلي، چې د طالبانو د اطلاعاتو او فرهنګ وزارت د دې طرحې د مشروط پلي کېدلو ملاتړ کوي او همدا راز د دې طرحې په اړه ملاحظات او اندېښنې لري.
دې بنسټ ويلي، چې په پام کې نيول شوی امتياز بايد د ځای او وخت له محدوديت پرته د ټولو رسنيو لپاره يو ډول وي.
نی ټينګار کړی چې دا امتياز بايد په عادلانه توګه او د رسنۍ اړتيا، د رسنۍ د فعاليت ډول، د رسنۍ د کارکوونکو شمېر، د رسنۍ توليدي منځپانګې او د رسنۍ جغرافيايي محدودې ته په پام وارزول شي.
د نی په علاميه کې راغلي: «امتياز بايد بلاعوض وي او د رسنۍ فعاليت، خپلواکي او کاري منځپانګه اغېزمنه نه کړي.»
دې بنسټ ټينګار کړی چې رسنيو ته د امتياز ورکولو موخه بايد د رسنيو وده، د بيان د ازادۍ پياوړي کول او اطلاعاتو ته لاسرسی وي، نه دا چې په رسنيو کې توليدي منځپانګه محدوده کړای شي يا هم سانسور شي.
نی ويلي، چې هيله لري د طالبانو اطلاعات او فرهنګ وزارت د دې طرحې د اجرا کولو هڅې وکړي او د رسنيو د ملاتړ زمينه نوره هم پراخه کړي.
دې بنسټ له ملي او نړيوالو بنسټونو هم غوښتي چې له رسنيو سره دې همکار شي او ملاتړ يې وکړي.
د افغانستان د دولت تر سقوط وروسته په هيواد کې له ۶۰۰ رسنيو څخه تر نيمايي زياتې د طالبانو د بنديزونو او اقتصادي ستونزو له امله تړل شوې دي.
