اطلاعات روز: د ملګرو ملتونو د سرمنشي مرستيالې آمينې محمد څرګندونو ته تر غبرګونونو وروسته د آنټونيو ګوتريش وياند اسټيفان دوجاريک ويلي، چې دا سازمان د طالبانو لپاره لابي نه کوي.
دوجاريک دا څرګندونې تېره ورځ (چهارشنبه، ۳۰ د وري) د ملګرو ملتونو په مقر کې د يوې خبري غونډې پر مهال کړې دي.
ده ويلي، د می میاشتې په لومړيو کې چې کومه غونډه په قطر کې کېږي، په افغانستان کې د يوه مترقي مسير او ګډو موخو لپاره به نړيوال تعامل نور هم پیاوړی کړي.
د ملګرو ملتونو د عمومي منشي مرستيالې امينې محمد په پرينسټون پوهنتون کې د يوې غونډې پر مهال ويلي، چې دا سازمان هوډ لري تر څو په افغانستان کې د وضعيت د لا خرابيدا د مخنيوي لپاره په راتلونکو ورځو کې يوه غونډه راوبولي او د طالبانو د رسميت پېژندنې په اړه خبرې وکړي.
د دې دا څرګندونې په افغانستان کې دننه او دباندې له پراخ غبرګون سره مخ شوې او د دې لامل شوې چې د ملګرو ملتونو وياند يې په يوه غونډه کې په اړه وضاحت ورکړي.
اسټيفان دوجاريک ويلي، چې ملګري ملتونه د طالبانو لپاره لابي نه کوي، بلکې په راتلونکو ورځو کې د کېدونکې غونډې موخه د يوې واحدې تګلارې موندل دي تر څو د افغانستان له وضعيت سره مقابله وشي او د نورې بې ثباتۍ مخه ونيول شي.
همدا راز دوجاريک زیاته کړې، چې ملګري ملتونه د طالبانو د رسميت پېژندنې صلاحيت نه لري، بلکې د دې سازمان غړي هيوادونه کولای شي چې پرېکړه وکړي.
په افغانستان کې د طالبانو پر واکمنۍ تر يوه نيم کال زيات وخت اوړي، خو لا هم هيڅ هيواد د دې ډلې حکومت په رسميت نه دی پېژندلی.
