اطلاعات روز: ننګرهار کې د کانال ریاست چارواکي وایي، چې اوس مهال یې په شنو خونو کې کرل شوې تازه تارکاري حاصل ته رسیدلې او د اټکل له مخې به یې سږنی حاصل د تیر په پرتله ډیر وي.
د کانال ریاست لپاره د طالبانو ویاند سید همایون غریبمل وایي، دا مهال د کانال اړوند ځمکو کې له سلو ډیرې شنې خونې جوړې شوي؛ چې اوس پکې بېلابېل ډوله کرلې تازه ترکاري حاصل ته رسېدلې چې په غېرې موسمي وخت کې بازار ته وړاندې کېږي.
د نوموړي په خبره په یادو شنو خونو کې دا مهال بادرنګ، رومیان، مرچ او یو شمېر نوره ترکاري حاصل ته رسېدلې او د ټولولو لړۍ يې روانه ده.
غریبمل زیاتوي: «د کانال ادارې د هډې دویم فارم دویم بلاک سیمه کې په ۱۰۱ شنو خونو کې تازه سبزجات کرلي او په یادو شنو خونو کې شاوخوا سل کسانو ته د کار زمینه برابره شوې؛ په پلان کې لرو چې دا شنې خونې نورې هم زیاتې کړو او نور پانګوال هم لیواله شوي چې شنې خونې جوړې کړي.»
نوموړی زیاتوي د کانال ریاست له لوري دا شنې خونې کرنیزو شرکتونو ته په قرارداد ورکړل شوي او اوس مهال پکې فعالیت سرته رسوي.
جمعه ګل یو د شنو خونو له قرادادیانو دی چې یادې شنې خونې یې په قرارداد نیولي دي.
نوموړی له کانال او نورو اړونده حکومتي ادارو غوښتنه کوي، چې د شنو خونو د پرمختګ لپاره دې ورسره د کیمیاوي سرو، اصلاح شویو تخمونو په برخه کې مرسته وکړي تر څو دوی وکولای شي، په لوړ کچه حاصل ولري او په غېرې موسمي وخت کې پرې د خلکو اړتیا پوره شي.
جمعه ګل زیاتوي: «سږکال مو په شنو خونو کې بادرنګ، بانجان، مرچک او رومیان کرلي او اوس مهال حاصل ته رسیدلي، له حاصل یې خوښ یو، له حکومت غواړو چې زمونږ د حاصلاتو لپاره دې سړې خونې جوړې کړي او هم دې د شنو خونو اجارې کمې کړي.»
په یادو شنیو خونو کې ګڼ شمیر کسانو ته د کار زمینه هم برابره شوې ده.
له دې ډلې شبیر احمد په یادو شنو خونو کې کار کوي دی وایي، خوښ دی چې په خپل هېواد کې ورته د کار زمینه برابره شوې ده.
د کانال ریاست مسوولین شنې خونې د خپل عاید مهمه سرچینه بولي او وایي، پلان کې لري چې دې برخه کې لا ډېر کار وکړي او زیاتوي که اړتیا ولیدل شي نو یو شمېر نورې شنې خونې به هم جوړې کړي.
که څه هم اوس مهال د پخوا په پرتله په ختیځ کې د شنو خونو شمېر زیات شوی خو خلک وایي، لاهم نورو شنو او سړو خونو ته اړتیا ده تر څو پکې د اړتیا وړ ترکاري او میوې خوندي او د اړتیا پر مهال بازار ته عرضه شي.
