اطلاعات روز: په بهر کې «د افغانستان د اسلامي جمهوريت» سياسي او قونسلي استازوليو په يوه ګډ پيغام کې ويلي، چې په کابل کې ځانمرګی بريد د امنيت په تامينولو کې د طالبانو ناکامي ښيي.
دا بريد چې طالبان يې ناکام شوی بولي، پرون (دوشنبه، ۷ د وري) د افغانستان د بهرنيو چارو وزارت ودانۍ ته نږدې وشو.
د طالبانو د کورنيو چارو وزارت وايي، چې په دې بريد کې شپږ تنه وژل شوي او يو شمېر نور ژوبل دي.
په بهر کې د افغانستان سياسي استازولۍ او قونسلګرۍ چې د پخواني حکومت له ډيپلوماټانو سره دي، په يوه پيغام کې ويلي، چې د بهرنيو چارو وزارت يو شمير کارمندان هم وژل شوي او ژوبل دي.
په دې پيغام کې راغلي، چې د دې پېښې کېدل «د دې خونړۍ پېښې د عاملينو سخت زړي توب او د امنيت په تأمين کې د طالبانو ناکامي ښيي».
«د افغانستان د اسلامي جمهوريت» سياسي استازوليو او قونسلګريو دا بريد غندلی او د قربانيانو له کورنيو سره يې خواخوږي ښودلې.
داعش ډلې د دې بريد مسووليت منلی او ويلي يې دي چې د دې ډلې يو ځانمرګی بريدګر توانېدلی چې د طالبانو د بهرنيو چارو وزارت په مخ کې بريد وکړي.
د داعش له ادعا سره سم، په دې بريد کې د «ډيپلوماټانو» په شمول ۲۰ تنه وژل شوي دي.
د طالبانو د کورنيو چارو وزارت تېره ورځ په دې برید کې د مرګ ژوبلې شمیر شپږ تنه ښودلی و.
دا وزارت وايي، چې يو ځانمرګی بريدګر هدف ته تر رسېدو وړاندې ويشتل شوی او له ده سره شته چاودېدونکو توکو چاودنه کړې ده.
تېره ورځ په کابل کې ايمرجنسي روغتون هم اعلان کړی و چې د دې روغتون جراحۍ څانګې ته دوه مړه او ۱۲ ژوبل کسان ور وړل شوي چې يو پکې ماشوم دی.
د تېر لمريز کال د مرغومې مياشتې په وروستيو کې د طالبانو د بهرنيو چارو وزارت مخته چاودنه شوې وه چې د هغې مسووليت هم داعش منلی و. په هغه بريد کې تر ۲۰ زيات کسانو ته مرګ ژوبله اوښتې وه.
