اطلاعات روز: د متحده ايالاتو د استازو مجلس د بهرنيو اړيکو د کميټې رييس مايک مک کال د دې هيواد د بهرنيو چارو وزارت تورن کړی چې له افغانستانه د امريکايي نظاميانو د وتلو په اړه په څېړنيز بهير کې خنډونه جوړوي او ويلي يې دي چې دا وزارت غواړي په امريکا کې عامه افکار بې لارې کړي.
نوموړي دا څرګندونې د امريکا د بهرنيو چارو وزارت د وياند نيډ پرايس هغو خبرو ته په ځواب کړي چې ويلي يې و، دا وزارت په څېړنو کې بشپړه همکاري کوي.
خو د استازو مجلس د بهرنيو اړيکو د کميټې له لوري چې د مايک مک کال کومه اعلاميه خپره شوې، پکې راغلي چې د بهرنيو چارو وزارت له افغانستانه د وتلو په اړه د کميټې د څېړنو په بهير کې خنډونه جوړوي «او موږ دا نشو زغملای.»
ده ويلي، چې د امريکا خلک حق لري چې له افغانستانه د فاجعه ناکې وتنې په اړه ځواب تر لاسه کړي.
مايک مک کال زياته کړې: «دا پر شاتګ پر دې حکومت يو داغ دی او د دې وزارت له لوري د خپل نه شفافيت د پټولو هڅې يو بل دليل دی چې موږ بايد ځوابونه تر لاسه کړو.»
د امريکا د استازو مجلس د بهرنيو اړيکو د کميټې رييس وړاندې ويلي و، چې که د دې هيواد د بهرنيو چارو وزارت له افغانستانه د وتلو په اړه اسناد وړاندې نه کړي، نو بايډن د حکومت د بهرنيو چارو وزير آنټوني بلينکن ته به احضاريه ولېږل شي.
د امريکا د کنګرې د بهرنيو اړيکو کميټې تېره اونۍ له افغانستانه د امريکا د وتنې په اړه د خپلو څېړنو په پېل کې د امريکايي نظاميانو شاهدي واورېده.
د متحده ايالاتو سمندري پوځي ټايلر وارګاس اندروز د هغو ورځو تفصيلي او عاطفي شاهدي ورکړې چې يوې چاودنې پکې د ۱۳ امريکايي نظاميانو او تر ۱۰۰ د زياتو افغانانو ژوند واخيست.
وارګاس اندروز دا پرشاتګ يو «ناورين» بللی او قانون جوړوونکو ته يې ويلي، چې «د نه توجيه وړ بې احتياطي او مسووليت نه منل موجود و.»
