اطلاعات روز: د افغانستان لپاره د ملګرو ملتونو د ځانګړي بشري صندوق رهبرۍ کميټې د متحده عربي اماراتو په دوبۍ ښار کې غونډه کړې ده.
د دې صندوق پر ټويټرپاڼه ليکل شوي، چې د بسپنه ورکوونکو بشري مرسته د ښځو او ماشومانو په ګډون د افغانستان د هغو ۹۷ سلنه وګړو لپاره ده چې په فلجوونکي فقر او لوږه کې ژوند کوي.
د دې غونډې په اړه نور جزييات نه دي ورکړل شوي.
د ملګرو ملتونو د بشري مرستو د همغږۍ دفتر (اوچا) بیا وايي، چې په افغانستان کې شاوخوا شپږ ميليون وګړي د خوراکي نا امنۍ له بېړنۍ کچې سره مخ دي او يوازې يو ګام له لوږې لېرې دي.
د دې دفتر په وينا، په افغاننستان کې بشري اړتياوې په چټکۍ سره زياتې شوي او په ۲۰۱۹ کال کې له ۶.۳ ميليونه وګړو څخه په ۲۰۲۳ کې ۲۸.۳ ميليونه وګړو ته رسېدلي او شدت يې هم زيات شوی دی.
په افغانستان کې د طالبانو تر واکمنېدو وروسته فقر او لوږه زياته شوې ده.
اوچا وايي چې سږ ميلادي کال په افغانستان کې تر ۲۸ ميليونه ډېر وګړي بشرپالو مرستو ته اړتيا لري.
د دې دفتر په وينا، له ۲۳ ميليونه وګړو سره مرسته لومړيتوب لري.
ملګرو ملتونو په افغانستان کې د بشري عملياتو لپاره د ۴.۶ ميليارد ډالرو غوښتنه کړې ده.
