اطلاعات روز: د بشر حقونو څار بنسټ د ښځينه برخې مسوولې هيدر بار ويلي، چې په ټوله نړۍ کې «ښځه ځپونکي» په افغانستان کې د طالبانو له لوري د ښځو او نجونو د حقونو تروړنې زړور کړي او الهام يې ځنې اخيستی دی.
اغلې بار نن (پنج شنبه، ۱۱ د کب) سهار د يوه ټويټ له لارې په ايران کې د زده کوونکو ځنځيري مسموميت ته په اشارې سره ليکلي، چې د طالبانو او په نړۍ کې د «ښځه ځپونکو» ګډه موخه د جنسيتي اپارتايد تحميلول دي.
د دې په وينا، نړيوالې ټولنې په افغانستان کې د طالبانو له لوري د ښځو او نجونو د حقونو تروړنې ته موثر ځواب نه دی ورکړی او دا د دې لامل شوی دی چې نور «ښځه ځپونکي» له طالبانو الهام واخلي.
هيدر بار په داسې حال کې د ايران د مسمومو شويو نجونو لور ته اشاره کړې چې د وروستيو مياشتو پر مهال د ايران په بېلابېلو ښارونو کې په سلګونو نجونې مسمومې شوې دي.
ايراني چارواکو د مسموميت عاملين نه دي ښودلي، خو له خارجي عواملو سره يې تړلي ګڼلي. د ايران د معارف وزارت ويلي، چې په ښوونځيو کې د «مسمومي ګازونو د خپرولو سرچينه» پلټي.
دې لور ته په افغانستان کې (د ايران ختيځ ګاونډی) طالبانو پر افغانستان له واکمنېدو سره سم تر شپږم ټولګي پورته نجونې ښوونځيو ته له تلو منع کړې دي. دې ډلې يو څه وخت وړاندې نجونې پوهنتونو ته له تلو هم بندې کړې.
د طالبانو د لوړو زده کړو وزارت په خپل تازه فرمان کې پوهنتونونه يوازې د نارينه محصلينو لپاره پرانيستي دي.
