اطلاعات روز: د متحده ايالاتو د سولې انسټيټيوټ په خپل تازه راپور کې ويلي، چې د افغانستان طالبان به د پاکستاني طالب جنګياليو له ملاتړه لاس وانخلي او دوی په دې هم پوهېږي چې اسلام اباد د اقتصادي ستونزو له وجې نشي کولای د پاکستاني طالبانو د تحريک پر وړاندې ستر پوځي عمليات پېل کړي.
د متحده ايالاتو د سولې انسټيټيوټ نن (پنج شنبه، ۲۷ د سلواغې) په خپل خپاره کړي راپور کې خبرداری ورکړی چې «د پاکستان د اقتصادي بحران او په افغانستان کې د طالبانو د واکمنۍ له کبله د پاکستاني طالبانو تحريک يو زياتېدونکی قوي ګواښ دی».
راپور پر اسلام اباد د کابل وروستيو نيوکو ته اشاره کوي او وايي چې «دا غير ډيپلوماټيکه ژبه د ټي ټي پي په تړاو د طالبانو د ملاتړ ژمنتيا ښيي، که څه هم پاکستان پر [طالبانو] خپل فشار زيات کړي».
دې ادارې زياته کړې کړې، چې د ټي ټي پي په تړاو د طالبانو ځواب «په متقابل تور بدل شوی او داسې ښکاري چې په ملاتړ کې يې کوم بدلون نه راځي».
په دې راپور کې د ملګرو ملتونو د چارواکو او نور راپورونه هم را اخيستل شوي چې ښيي د ټي ټي پي غړي د افغانستان په ښارونو کې ازاد ګرځي او هلته سوداګرۍ لري.
د (USIP) راپور زياتوي چې له کندهار څخه يوې سرچينې ويلي، چې د طالبانو رهبر او د هغه نږدې مشاورين «له ټي ټي پي سره د ايډيولوجيکو شراکتونو له وجې نشي کولای، له هغوی خپل ملاتړ واخلي».
له دې راپور سره سم چې د ټي ټي پي پر وړاندې د پاکستان غبرګون، د دې هيواد له خراب اقتصادي وضعيت څخه هم اغېزمن دی چې د شواړ کېدو په حال کې دی. «همدا د پاکستان د پوځي غبرګون انتخابونه محدودوي. پاکستان کولای شي چې چاپې ووهي او په هيواد کې دننه دفاعي اقدامات وکړي، خو د دوامدار، لوی او پېچلي پوځي غبرګون لپاره منابع نه لري.»
راپور زياتوي چې د ټي ټي پي پراخېدونکی تاوتريخوالی «د دې ډلې سياسي او مادي وده ښيي، سياسي جوړښت يې قوي شوی او خپل جنګيالي، ځانمرګي، وسلې او مهمات زياتوي».
راپور ادعا کوي چې «افغان طالبان د ټي ټي پي ملاتړ کوي او خوندي ځايونه يې ورکړي دي.» همدا راز په راپور کې ويل شوي چې ټي ټي پي له دې پرته هم په افغانستان کې پراخ ملاتړ لري «طالبان او غير طالبان دواړه له پاکستان سره د سخت اختلاف له وجې د ټي ټي پي تر شا ولاړ دي».
راپور زياته کړې چې يو شمېر افغان طالبانو په ځانګړې توګه د طالبانو د کورنيو چارو وزير سراج الدين حقاني د پاکستان په غوښتنه د ټي ټي پي ځينې مشران تر کنټرول لاندې ساتلي. «خو په طالبانو کې دننه د ټي ټي پي ملاتړ زيات دی او د فعاليتونو حمايت يې کوي. په ځانګړې توګه، د طالبانو رهبر هبت الله اخوندزاده له ټي ټي پي سره موافق دی چې پاکستانی سيسټم غير اسلامي دی».
