اطلاعات روز: د طالبانو تر مديريت لاندې د ازموينې ادارې اعلان کړی چې د طبي شورا ازموينه (Exit Exam) به د طبي څانګو له نارينه فارغانو د سلواغې پر ۲۹مه اخيستل کېږي.
دې ادارې ويلي، چې د دواطلبانو بايوميټريک او ورته د کارډونو وېش به د پنج شنبې او جمعې په ورځو ترسره شي.
طبي شورا په يوه مکتوب کې ويلي، چې د زياتو متقاضيانو او کمو لازمو امکاناتو له کبله به دا ازموينه په دوو پړاوونو کې اخيستل کېږي.
دې شورا ويلي، چې په لومړي پړاو کې به له نارينهوو د سلواغې پر ۲۹ ازموينه اخيستل کېږي او د ښځو د ازموينې نيټه به وروسته اعلان شي.
په تېر مهال کې د طبي شورا ازموينه له ښځو او نارينهوو هممهاله اخيستل کېدله. دا پرېکړه په داسې حال کې کېږي چې طالبانو نجونې او ښځې له ښوونځي او پوهنتون څخه هم بې برخې کړې دي.
د طالبانو تر واکمنېدو وروسته دا د طبي شورا لومړۍ ازموينه ده چې اخيستل کېږي.
د تېر حکومت پر مهال دا ازموينه په کال کې دوه ځله د دولتي او خصوصي پوهنتونو د طبي څانګو له فارغينو اخيستل کېدله.
د طبي شورا په ازموينه کې له برياليتوب پرته د طبي څانګو فارغين نشي کولای چې د کار جواز تر لاسه کړي.
د طبي څانګو فارغين د طبي شورا د ازموينې پر نیټه نيوکې کوي.
