اطلاعات روز: د افغانستان لپاره د امريکا سفارت چې په قطر کې فعال دی، «د علم برخه کې د ښځو او نجونو له نړيوالې ورځې» سره هممهاله تعلیم او تحصيل ته د ښځو او نجونو د لاسرسي پر حق ټينګار کړی دی.
نن (شنبه، ۲۲ د سلواغې/۱۱ فبروري) د علم برخه کې د ښځو له نړيوالې ورځې سره برابره ده.
د افغانستان لپاره د متحده ايالاتو ډيپلوماټيک ماموريت ويلي، چې د دې ورځې په وياړ د افغان نجونو د روباټيک ټيم حيرانوونکي کار او فعاليت ته ځانګړې پاملرنه کوي.
دې ماموريت زياته کړې، چې روباټيکه ډله د هيلو او هلوځلو يوه الګو ده. دې ډلې د طالبانو تر واکمنېدو وروسته افغانستان پرېيښی دی.
د امريکا سفارت پر خپله ټويټر پاڼه ليکلي: «که افغان ښځو او نجونو ته فرصت ورکړل شي، دوی کولای شي چې په خپل نوښت د ټيکنالوژۍ له مخې د يوې نوښتګرې نړۍ په جوړولو کې مرسته وکړي.»
دې سفارت ټینګار کړی چې افغان ښځې او نجونې په ټولو سطحو کې د زده کړې کولو حق او وړتيا لري. په داسيې حال کې چې طالبانو د نجونو په وړاندې د ښوونځيو او پوهنتونونو دروازې تړلې دي.
همدا راز د طالبانو حکومت د ښځو پر کار کولو هم بنديز لګولی دی. دا ډله وايي چې پر ښځو او نجونو بنديزونه همېشني نه دی، خو بنديزونه ورځ تر بلې ورځ زياتېږي.
