اطلاعات روز: د افغانستان د بشري حقونو خپلواک کميسيون چې له هیواده بیرون فعالیت کوي، په افغانستان کې د ملګرو ملتونو د معاونت دفتر (يوناما) په ګډون د بشري حقونو له سازمانونو څخه غوښتي چې د الهه دلاورزۍ د خوشې کولو لپاره دې هڅې وکړي.
الهه دلاورزۍ هغه محصله ده چې څه موده وړاندې يې يوه ويډيو خپره کړه او ادعا يې وکړه چې د طالبانو د کورنيو چارو وزارت پخواني وياند سعيد خوستي د دې ډلې د استخباراتو په رياست کې پر دې «تېری» کړی او وروسته يې په زور نکاح کړې ده.
ويل کېږي چې تر دې ويډيو وروسته پاکستان ته تښتيدلې وه، خو طالبانو دا له پاکستانه راګرزولې او زنداني کړې یې ده.
د افغانستان د بشري حقونو خپلواک کميسيون نن (دوشنبه، ۱۷ د سلواغې) د يوې اعلاميې په خپرولو سره ويلي چې له الهه دلاورزۍ سره د يو شمير طالب مسوولينو د غير انساني چلند او نيونې اتيا ورځې کېږي.
د دې اعلاميې له مخې، په دې وروستيو کې د دلاورزۍ کورنۍ يوه ويډيو خپره کړې او د الهې د شکنجې او بد وضعيت په اړه يې انديښنه ښودلې.
د افغانستان د بشري حقونو خپلواک کميسيون دا ډول چلند انسان ضد بللی او غندلی يې دی. دې کميسيون د الهه دلاورزۍ د بې قيد او شرطه ازادېدو غوښتنه کړې.
د افغانستان د بشري حقونو خپلواک کميسيون د ملګرو ملتونو د بشري حقونو له سازمانونو په ځانګړې توګه په کابل کې له يوناما، د افغانستان په چارو کې د دې سازمان د بشري حقونو له ځانګړي راپورچي، د ملګرو ملتونو له ښځينه سازمان او د ښځينه حقونو د ملاتړ له سازمان څخه غوښتنه کړې چې د الهې د خوشې کېدو او د امنيت خوندي کېدو په لړ کې دې جدي هڅې وکړي.
