اطلاعات روز: په ملګرو ملتونو کې د افغانستان د استازولۍ سرپرست نصیر احمد فايق د پاکستان د استازي څرګندونو ته په غبرګون کې ويلي، چې پر ښځو او نجونو د طالبانو بنديزونه د طالبانو فرهنګ دی او د افغانستان د خلکو له فرهنګ سره هيڅ اړيکه نه لري.
په ملګرو ملتونو کې د پاکستان استازي منير اکرم پرون (چهارشنبه، ۱۲ د سلواغې) د افغانستان په اړه د دې سازمان په يوه غونډه کې وويل، چې د طالبانو له لوري د ښځو پر کار او زده کړو بنديز ديني اړخ نه لري، بلکې دا د پښتنو ځانګړی کلتور دی.
فايق د منير اکرم څرګندونې ردوي او ويلي يې دي چې د طالبانو اعمال نه هم په اسلام کې ځای لري او نه هم د افغانستان د خلکو له کلتور سره تړاو لري.
ده زياته کړې: «زه له منير اکرم سره همغږی نه يم. دا (د نجونو پر زده کړو بنديز) هيڅ وخت د افغانستان د خلکو او ان پښتنو فرهنګ نه و.» د ده په وينا، د پاکستان په شمالي وزيرستان کې چې اکثريت اوسېدونکي يې پښتانه دي، هم د نجونو له زده کړو سره مخالفت نه دی شوی.
فايق زياته کړې، چې طالبانو په تېرو شلو کلونو کې په هغو سيمو کې ښوونځي سوځول چې د دوی تر واک لاندې وې.
په ملګرو ملتونو کې د استازو څرګندونو پر ټولنيزو رسنيو هم غبرګونونه را پارولي دي.
د دفاع وزارت پخواني معين شاه محمود مياخيل ويلي، چې «متعصب طالبان» د پښتنې ټولنې استازي نه دي، «خو په حقيقت کې د آی ايس آی او پاکستانيانو د غوښتنو استازولي کوي.»
طالبانو واک ته تر رسېدلو وروسته لومړی تر شپږم ټولګي پورته نجونو پرمخ ښوونځي وتړل. په وروستيو کې يې د نجونو لوړې زده کړې وځنډولې او په غير دولتي بنستونو کې يې د ښځو پر کار کولو بنديز هم ولګاوه.
دا ډله وايي چې د ښځو پر زده کړو بنديز همېشنی نه دی، بلکې تر امر ثاني پورې دی؛ خو څرګنده نه ده چې ښوونځي او پوهنتونونه به څه وخت د ښځو پرمخ پرانستل شي.
