اطلاعات روز: د افغانستان د سولې په چارو کې د امريکا پخواني ځانګړي استازي زلمي خليلزاد يو ځل بيا له طالبانو غوښتي چې د ايران په زاهدان کې دې د سنيانو د جمعې خطيب مولوي عبد الحميد خبرې واوري.
عبد الحميد پرون (۷ د سلواغې) د جمعې ورځې خطبه کې د ښځو او نجونو د کار او زده کړې د حق ملاتړ کړی دی.
ده د افغانستان په اړه راپورونه ټکان ورکوونکي بللي او ويلي يې دي چې دا هيواد له بېمخينې يخنۍ سره لاس او ګرېوان دی.
مولوي عبد الحميد له نړيوالې ټولنې غوښتي چې د افغانستان د خلکو لپاره دې د طالبانو له حکومت سره ډيپلوماټيکې اړيکې ټینګې کړي.
دا پېژندل شوی ايرانی عالم وايي، چې باور لري چې ښځې بايد کار او زده کړې وکړي.
ده زياته کړې، چې که له طالبانو سره ډيپلوماټيکې اړيکې ټينګې شي، د اسلامي نړۍ علماء کولای شي په افغانستان کې بشري حقونو ته د درناوي لپاره کار وکړي.
مولوي عبد الحميد تېره اونۍ هم د افغانستان د ښځو او نجونو د حقونو په اړه خبرې کړې وې.
خليلزاد چې له طالبانو سره يې د سولې موافقه لاسليک کړې او واک ته د طالبانو د را ستنېدلو عامل ګڼل کېږي، د مولوي عبد الحمید د جمعې د لمانځه خطبه بيا خپره کړې او له طالبانو يې غوښتي چې وايې وري.
طالبانو واک ته تر رسېدو وروسته لومړی تر شپږم ټولګي پورته نجونې له ښوونځي بندې کړې. په وروستيو کې يې د ښځو پر لوړو زده کړو او په غير دولتي بنسټونو کې د ښځو پر کار کولو هم بنديز ولګاوه.
