اطلاعات روز: د طالبانو ماليې وزارت په ۳۴ ولايتونو کې د تخنيکي او مسلکي زده کړو له استادانو سره د ملګرو ملتونو د ماشومانو د ملاتړ صندوق (يونیسف) مالي مرسته، د هغوی له معاشه کموي.
له دې استادانو څخه يو وايي، چې يونيسف له دوی سره ۲۰۰ ډالره مرسته کړې وه.
د دې استاد په وينا، اوس د طالبانو ماليې وزارت غواړي چې دا پيسې د استادانو د سلواغې او کب میاشتو له معاشونو څخه کمې کړي.
د طالبانو تر مديريت لاندې د تخنيکي او مسلکي زده کړو د ادارې له لوري ولايتي آمريتونو ته په لېږل شوي مکتوب کې هم ويل شوي، چې د ماليې وزارت له امر سره سم دې، د يونيسيف مرسته د استادانو د سلواغې او کب مياشتو له معاش څخه کمه شي. ويل شوي و چې يونيسيف په لیندۍ مياشت کې د تخنيکي او مسلکي زده کړو د مرکزونو له استادانو سره ۲۰۰ ډالره مرسته کړې وه چې معادل يې ۱۸ زره افغانۍ کېږي.
دې ادارې لومړی د وضاحت غوښتنه کړې وه، خو د طالبانو ماليې وزارت په ځواب کې د خپل مکتوب پر پلي کېدلو ټينګار کړی و او ويلي يې و چې له دوو ځايونو د معاش ورکړه شونې نه ده.
دا په داسې حال کې ده چې د يونيسف پيسې معاش نه و، بلکې نغدي مرسته وه.
يوه استاد اطلاعات روز ورځپاڼې ته وویل، کله چې په خپله طالبان نشي کولای له استادانو سره مرسته وکړي، د «يهودو او نصاراو» مرسته دې دهغوی له معاش نه ګرځوي.
يونیسف د معارف وزارت اړوند ښوونځيو له ښوونکو سره هم نغدي مرسته کړې ده. روښانه نه ده چې ايا د هغوی معاش هم کم شوی او که نه.
