اطلاعات روز: د استرالیا کرکټ بورډ د افغانستان کرکټ ملي لوبډلې سره خپلې یو ورځنۍ نړیوالې لوبې چې ټاکل شوې وه د کب میاشت کې په متحده عربي اماراتو کې ترسره شي لغوه کړې دي.
د دې پرېکړي دليل د طالبانو له لوري د نجونو د زده کړو پر بنديز اعتراض کول ښودل شوي دي.
ټاکل شوې وه چې استراليا د هند تر سفر وروسته د سوپر ليګ سياليو په لړ کې له افغان لوبډلې سره په متحده عربي اماراتو کې لوبې وکړي.
خو د استراليا کرکټ بورډ په يوه اعلاميه کې ويلي، چې له خپل دولت سره تر مشورې وروسته دې پايلې ته رسېدلي او اوس مهال نشي کولای چې په هغه سوپر ليګ سياليو کې ګډون وکړي چې د ۲۰۲۳ کال مارچ میاشت کې په متحده عربي اماراتو کې ترسره کېږي.
اعلامیه زیاتوي، چې دا پرېکړه تر هغه وروسته وشوه چې د طالبانو له لوري د ښځو پر کار، زده کړو، پارکونو او ورزشي ځايونو ته پر تګ بنديز ولګېد.
د استراليا کرکټ بورډ ويلي، چې د افغانستان په ګډون په ټوله نړۍ کې د کرکټ ودې ته ژمن دي او په افغانستان کې د ښځو او نجونو د حالت ښه کولو لپاره به د افغانستان له کرکټ بورډ سره خپلو همکاريو ته دوام ورکړي.
دا په تېرو دوو کلونو کې دويم ځل دی چې د استراليا کرکټ بورډ له افغانستان سره دوه اړخيزې لوبې د ښځو په اړه د طالبانو د سياستونو له کبله لغو کوي.
تر دې وړاندې هم په پام کې وه چې ۲۰۲۱ کال کې د دواړو اړخونو تر منځ لوبې وشي، خو لغو شوې.
