اطلاعات روز: د سویل ختیځ زون په پکتیا او لوګر ولایتونو کې لسګونه قومي مشرانو په جوړو شویو غونډو کې له طالبانو غوښتنه کړې چې په دولتي ادارو کې دې عدالت تامین او د خلکو ستونزو او غوښتنو ته دې رسېدنه وشي.
په لوګر ولایت کې د مرکز پل عالم او بېلابېلو ولسوالیو مخورو ویلي، خلک حقیقي اسلامي نظام پلې کېدل غواړي او له طالبانو یې په ځینو مسایلو کې د خپلسرو او د ولس له خوښې پرته د ځینو پرېکړو په کولو هم نیوکې کړي.
د دغه ولایت ځايي مخور وايي، ولس له اقتصادي ستونزو سره مخ دی او بېړنیو مرستو ته اړتیا لري.
دوی همدا راز په رغنیزه برخه کې لوګر ته د مرکزي ادارې په ځانګړې پاملرنې هم ټینګار وکړ او ویې ویل، چې په مرکز پل عالم او ځینو لېرې پرتو ولسوالیو کې خلک په کرنې او نورو برخو کې ځینو پروژو پلې کېدو ته اړتیا لري.
په همدې حال کې په پکتیا ولایت کې هم ګڼو مشرانو په ورته غونډه کې د طالبانو له حکومت غوښتنه کړې چې په خپل نظام کې عدالت پلی کړي.
دوی څرګنده کړې چې پکتیا په تېرو نظامونو کې هم له پامه غورځول شوې وه او د طالبانو له دوه کلنې دورې تېرېدو وروسته هم ورته په بېلابېلو برخو کې د پام وړ پاملرنه نه ده شوې.
پکتیا والو همدا راز د طالبانو د حکومت له مشرانو غوښتنه کړې، چې خلکو په ورځني ژوند کې د ستونزو جوړېدو پر ځای باید هغوی ته اسانتیاوې رامنځته شي.
په همدې ناستو کې د طالبانو د قومونو، سرحدونو او قبایلو چارو وزارت چارواکو هم ګډون کړی و او په خپلو خبرو کې یې د قومونو په یووالي ټینګار وکړ.
