اطلاعات روز: د افغانستان د خبريالانو فدراسيون او رسنيزو بنسټونو د طالبانو د اطلاعات او فرهنګ وزارت د رسنيو د څار رييس عبد الحق حماد څرګندونو ته په غبرګون کې ويلي، چې له بهره د فعالیت کوونکو رسنيو مسوولين په غياب کې محاکمه کول غير شرعي او غير قانوني دي.
عبدالحق حماد هغه رسنۍ چې له بهره فعاليت کوي د طالبانو پر ضد په تبليغ او د «نظام په تخريب» تورنې کړي او ويلي يې دي چې دا رسنۍ به محاکمه کېږي او ژر به يې په اړه پرېکړه اعلان شي.
د تېر لمریز کال زمري/اسد مياشت کې پر افغانستان د طالبانو تر بيا واکمنېدو وروسته، يو شمېر رسنيو د طالبانو په خوښه د خپرونو کول نه دي منلي او له هيواده دباندژ يې خپل فعاليت ته دوام ورکړی دی.
د طالبانو په اطلاعاتو او کلتور وزارت کې د رسنيزو خپرونو د څار رييس ويلي: «د دې رسنيو په اړه پرېکړه شوې، موضوع تر محکمې رسيدلې او په څو ورځو کې به يې محکمه په اړه پرېکړه وکړي او دا پرېکړه به اعلان شي.»
د افغانستان د خبريالانو فدراسيون او رسنيزو بنسټونو ويلي چې په اسلام کې غيابي محکمه «يوازې د حق د ضياع پر وخت روا ده» نور په هيڅ حالت کې هم غيابي محکمه جواز نه لري.
د دې فدراسيون په وينا، د بشري حقونو نړيوال قوانين هم غيابي محکمه يوازې د حق د ضياع پر مهال په رسميت پېژني.
د خبريالانو د فدراسيون او د افغانستان د رسنيزو بنسټونو په باور، په دې اړه د طالبانو هر ډول اقدام غير شرعي او غير قانوني دی، ځکه «دلته د حق د ضياع مصداق روښانه نه دی.»
دې فدراسيون ويلي، چې له کمونيستي نظام پرته د افغانستان ټولو قوانينو غيابي محکمه د حق د ضايع کېدو پر مهال تاييد کړې او له دې څخه سياسي استفاده يې غير قانوني بللې.
دغه راز د خبريالانو فدراسيون ويلي، اوس مهال په افغانستان کې هيڅ ډول قانون نشي پلي کېدای او طالبان حنفي فقه د خپلو حقوقي کړنو لپاره د اصل په توګه مني.
د دې فدراسيون په وينا چې حنفي فقه هم د غيابي محکمو په تړاو د حق د ضياع اصل په رسميت پېژني.
د خبريالانو فدراسيون ويلي، چې غيابي محکمې د ديکتاتورو نظامونو له لوري په ټولنه کې پر فردي او ټولنيزو ازاديو د فشار د يوې وسيلې په توګه کارېږي او له نړيوالو قوانينو سره سم د بشري حقونو نقض بلل کېږي.
د خبريالانو فدراسيون او د افغانستان رسنيزو بنسټونو له ملګرو ملتونو او نړيوالې ټولنې غوښتي چې د طالبانو د «تاوتريخجنو» اقداماتو مخنيوی وکړي او رسنيز حقوق دې په افغانستان کې ضايع کېدو ته نه پرېږدي.
طالبانو واک ته تر رسېدو وروسته پر رسنيو او خبريالانو ګڼ بنديزونه لګولي دي. د افغانستان د خبريالانو د مرکز له موندنو سره سم، د طالبانو تر واکمنېدو وروسته د ۶۰۰ ږغيزو، چاپي، انځوريزو او پر ليکه رسنيو څخه نيمايي او يا تر دې هم زياتې د طالبانو د بنديزونو له کبله تړل شوې دي.
