اطلاعات روز: د ۱۲ هيوادونو د بهرنيو چارو وزيرانو او د اروپايي اتحاديې لوړپوړي استازي په غير دولتي بنسټونو کې د ښځو د کار پر بنديز ژوره انديښنه ښودلې او ويلي يې دي چې د طالبانو دا پرېکړه د هغو ميليونونو افغانانو ژوند له ګواښ سره مخ کوي چې پر بشري مرستو متکي دي.
دا بیانیه د اسټراليا، کاناډا، ډنمارک، فرانسې، جرمني، ايټاليې، نروژ، سويس، هالنډ، بريتانيې، امريکا متحده ايالاتو د بهرنيو چارو وزيرانو او د اروپايي اتحاديې لوړ پوړي استازي خپره کړې ده.
دوی په غير دولتي داخلي او نړيوالو بنسټونو کې د ښځو پر کار بنديز بې پروا او خطرناکه پرېکړه ګڼلې او له دې ډلې يې غوښتنه کړې چې ژر تر ژره دې خپله پرېکړه بيرته واخلي.
د ۱۲ هيوادونو بهرنيو چارو وزيرانو او د اروپايي اتحاديې لوړپوړي استازي ويلي چې ښځې په بشردوستانه چارو او اساسي اړتياوو کې مرکزي رول لري.
د دوی په وينا، تر څو چې ښځې په افغانستان کې د مرستې رسولو په بهير کې شريکې نه شي، غير دولتي بنسټونه به ونه شي کولای چې د هيواد تر ټولو اړمنو خلکو ته خوراک، درمل او نور مواد چې ضرورت ورته ولري، ورسوي.
د ۱۲ هيوادونو د بهرنيو چارو وزيرانو او د اروپايي اتحاديې لوړپوړي استازي زیاته کړې چې طالبان د افغانستان د خلکو په ځانګړې توګه د ښځو او نجونو د حقونو او ازاديو تضعيفولو ته دوام ورکوي او له نړيوالې ټولنې سره د عادي روابطو په تړاو دلچسپي نه لري.
دوی کار، ښوونځي او پوهنتون ته د ښځو او نجونو د بيرته تلو غوښتنه کړې او ټينګار يې کړی دی چې طالبان دې په افغانستان کې د ښځو او نجونو سياسي، اقتصادي، ټولنيزو او فرهنګي حقونو ته درناوی وکړي.
