اطلاعات روز: د ملګرو ملتونو سرمنشي انټونیو ګوتریش ویلي، چې په افغانستان کې د طالبانو له لوري په غیر دولتي موسېسو کې د ښځو پر کار کولو د بندیز له امله سخت خواشینی دی.
د ګوتریش وياند استفان دوجاريک په يوه اعلاميه کې ويلي، چې د طالبانو دا پرېکړه به اړمنو خلکو په ځانګړې توګه ښځو او نجونو ته د مرستندويو سازمانونو د مرستې رسولو کار کمزوری کړي.
ده ويلي، چې ملګري ملتونه په افغانستان کې د ملي غير دولتي او نړيوالو شريکانو په ګډون هڅه کوي چې ۲۸ ميليونه افغانانو ته بشري مرستې ورسوي چې ژوندي پاتې شي.
د ګوتریش په وينا، د اغېزناکو بشري مرستو رسولو لپاره اړتيا ده چې ټولو اړمنو ته بشپړ، خوندي او له کوم خنډ پرته لاسرسی موجود وي.
دوجاريک ويلي: «په افغانستان کې د ژوند د خونديتوب لپاره له نړيوالې ټولنې سره د ښځو د کار منع کول به د افغانستان خلک د لا ډیرو ناويل شویو ستونزو سره مخ کړي.»
د طالبانو د اقتصاد وزارت تېره ورځ (شنبه، ۳ د مرغومي) د يوه رسمي مکتوب له لارې په غير دولتي کورنیو او بهرنيو موسېسو کې د ښځو پر کار کولو بنديز لګولی دی. اوس مهال دا موسېسات اړمنو ته مرستې رسوي په داسې حال کې چې د افغانستان نيم نفوس له لوږې سره مخ دی.
د طالبانو دې پرېکړي نړيوال غبرګونونه هم را پارولي دي.
په افغانستان کې د بشري مرستو د همغږۍ لپاره د ملګرو ملتونو دفتر (اوچا) د طالبانو له لوري په غير دولتي موسېسو کې د ښځو پر کار بنديز غندلی دی.
د افغانستان په چارو کې د امريکا ځانګړي استازي توماس وېسټ هم د طالبانو دا بنديز غير مسوولانه ګڼلی.
