اطلاعات روز: د پکتيکا ولايت په ګيان ولسوالۍ کې ځايي سرچينې وايي، چې له تېرو ۲۴ ساعتونو را په دې خوا ۹ ځله د زلزلې ټکانونه حس شوي دي.
ددغې ولسوالۍ يوه اوسېدونکي شمل وفادار اطلاعات روز ته وويل، چې له تېرې ورځې (جمعه، ۲ د مرغومي) راهيسې په «ږلۍ» او ځينو نورو سيمو کې زلزله شوې خو کوم چا ته پکې ځاني او مالي زيان نه دی رسېدلی.
د وفادار په خبره سيمه کې لاهم خلک له دې امله په ويره او له کورونو وتلي دي، چې يو ځل بيا د تېر په څېر له ځاني او مالي تلفاتو سره مخ نشي.
تر اوسه په دغه ولسوالۍ کې د شوې زلزلې د شدت کچه نه دی معلومه شوې او نه هم د پکتيکا ولايت لپاره د طالبانو ولايتي مسوولينو څه ويلي دي.
څو مياشتې وړاندې د ګيان په ګډون په برمل او د خوست ولايت په سپېرې ولسواليو کې د یوې زورورې زلزلې پر مهال د ګڼو مالي زيانونو سربېره سلګونه کسان مړه او ټپيان شول چې زياته برخه يې ښځې وې.
