اطلاعات روز: د طالبانو حکومت په کابل او ځينو ولايتونو کې د نجونو په وړاندې ښوونيز کورسونه هم تړلي او نه يې دي پرېيښي چې کورسونو ته ننوزي.
له کابل څخه يوې نجلۍ اطلاعات روز ته په خپل پيغام کې وويل، چې نن سهار (چهارشنبه، ۳۰ د لیندۍ) د پلازمينې په څلورمه ناحيه کې طالبان د عطارد ښوونيز کورس مخ ته ولاړ وو او نجونو ته يې د ننوتلو اجازه نه ورکوله.
دا نجلۍ وايي، چې د طالبانو غړو ورته وويل، چې امر له بره خوا شوی: «حتا دا يې راته وويل چې موږ هم ځورېږو. تاسو له موږ څخه مه خپه کېږئ، له پورته خوا امر راته شوی دی او موږ مجبور يو چې ويې منو.»
له تخار څخه هم سیمهييزې سرچينې وايي، چې طالبانو ورته ښوونيزو کورسونو ته د ننوتلو اجازه نه ده ورکړې.
په تالقان کې د جهش ښوونيز مرکز يوې زده کوونکې ويلي، چې نن سهار اووه بجې کورس ته ولاړه، خو طالبانو دې او د دې ټولګيوالو ته د ننوتلو اجازه ورنه کړه.
په تخار کې د طالبانو د معارف رييس مولوي حزب الله مبشر اطلاعات روز ته وويل، چې دا تصميم د طالبانو د کابينې د پرېکړې پر اساس نيول شوی دی.
دی وايي، چې د طالبانو د پوهنې وزارت د امر له مخې يې ټول ښوونيز مرکزونه د نجونو پر وړاندې تړلي دي.
د طالبانو د لوړو زده کړو وزارت د سې شنبې په ورځ اعلان وکړ چې د کابينې د پرېکړې او ددې ډلې د لوړو زده کړو د سرپرست وزير مولوي ندا محمد نديم د امر پر اساس، په پوهنتونو کې د نجونو زده کړې تر امر ثاني پوري «ځنډيدلې» دي.
دې تصميم ګڼ غبرګونونه را پارولي دي. د افغانستان په چارو کې د امريکا ځانګړي استازي توماس وېسټ ويلي، چې نړۍ بايد د طالبانو له دې سياست سره په متحده توګه مخالفت وکړي.
وړاندې په کابل کې د المان سفارت، بريتانيا، د بشر حقونو څار سازمان، د افغانستان لپاره د ملګرو ملتونو د بشري حقونو ځانګړي راپورچي او نورو هم دې تصميم ته غبرګونونه ښودلي دي.
طالبان چې د تېر لمريز کال د زمري په مياشت کې واک ته رسېدلي، تر شپږم ټولګي پورته نجونې يې هم له ښوونځیو ته منع کړې دي. دې ډلې له بيا – بيا ژمنو سره – سره نجونو ته اجازه نه ده ورکړې چې ښوونځيو ته ولاړې شي.
