اطلاعات روز: د زابل روغتيايي چارواکي خبر ورکوي، چې د دغه ولايت په سيوري ولسوالۍ کې د تورې ټوخلې ناروغۍ له کبله دوه ماشومان مړه شوي او نږدې ۲۰۰ نور پرې اخته شوي شوي دي.
د زابل لپاره د طالبانو د عامې روغتيا ریيس ډاکټر عبدالحکیم حکيمي اطلاعات روز ته وويل، د تورې ټوخلې يادې پېښې د تېرو دوو ورځو په موده کې د سيوري ولسوالۍ په سلام خېلو، محمد کريم، ښادي، ښالم او محمد خېلو کليو کې ثبت شوې دي.
د ده په وينا، سيمې ته يې روغتيايي ټيمونه لېږلي او هڅې روانې دي ترڅو هلته ټول ماشومان واکسين او د لا خپریدو مخه یې ونیسي.
د نوموړي په خبره: «زموږ هڅې روانې دې ترڅو د نورو مثبتو پېښو مخه ونيسيو، د تېرو څو ورځو راهيسې موږ د دې ناروغۍ نږدې اووه اوټ بریکه درلودل، په ټولو سیمو کې زموږ روغتیايي پرسونل شتون لري، اوس د ۲۰۰ کسانو عاجله درملنه روانه ده.»
دغه راز روغتيايي مسوولين له خلکو غواړي چې خپل ناروغ ماشومان شاوخوا روغتيايي مرکزونو ته انتقال کړي ترڅو هلته يې درملنه ترسره شي او د دغې ناروغۍ د پراخيدو مخنيوی وشي.
توره ټوخلې د تنفسي سیستم یوه ناروغۍ ده چې د یو ډول میکروب څخه منځته راځي، ډاکټران وایي، چې یاده ناروغۍ د یوه کال څخه په کم عمره ماشومانو کې ډیره خطرناکه وي او ناروغ باید ژر تر ژره روغتیايي مرکز ته واستول شي.
