اطلاعات روز: کندهار کې د برېښنا نشتون له امله صنعتکاران دې ته اړ شوي څو له دغه ولايت څخه خپلې فعاله او غير فعاله فابريکې نورو ګاونډيو هېوادونو ته انتقال کړي.
کندهار کې د برېښنا نشتون ستونزه چې تل د دغه ولايت ټول صنعتکاران ورڅخه سرټکوي اوس يې ډېری صنعت کاران دې ته اړ کړي څو دغه ولایت کې خپل فعالیت ودروي او نورو هیوادونو کې د پانګې اچونې په لټه کې شي.
نږدې ۳۵ ورځې کېږي چې د کندهار پر صنعتي پارک د هلمند د کجکي بند برېښنا بنده شوې چې اوس مهال يې دغلته د فابریکو کارونه د خنډ او ځنډ سره مخ کړي دي.
صنعت کاران
د کندهار په صنعتي پارک کې د تازه مېوې د پروسېس فابريکې مسوول شبیر احمد وایي، اوس مهال يوازې د څو محدودو ساعتونو لپاره برېښنا ورکول کېږي او دوی نه شي کولای د یادې بریښنا پر مټ خپلې چارې پرمخ یوسي.
هغه زياتوي، که دغه ستونزه ژر تر ژره هواره نه شي اړ دي ترڅو خپلې فابریکې پاکستان هېواد ته انتقال کړي.
نموړی زیاتوي، د طالبانو د سرپرست حکومت له مسوولينو سره یې څو ځله ناستې ترسره کړي خو پایله یې نه ده ورکړې او نور نه شي کولای چې دغه ډول په ټکني حالت خپل چارې پر مخ يوسي.
د ده په خبره، چې اوس مهال د کندهار ۶۰ سلنه صنعت کاران په دې هڅه کې دي ترڅو خپل کاروبار کابل او يا نورو ګاونډیو هېوادونو ته انتقال کړي.
هغه وایي، کوم توکي چې اوس مهال دوی توليدوي د تېلو د لوړې بيې له امله ورته په ډېره لوړه بيه پريوځي نو اړ دی چې ګران يې وپلوري.
د ده په وينا چې د ۴۸ ساعتونو په موده کې يوازې درې يا څلور ساعته برېښنا ورکول کېږي او پاتې نور وختونه دوی خپل ډېزلي ماشينونونه چالانوي.
ه صنعت کار وویل: «موږ صنعت کاران اوس مهال ترټولو ډېرې برېښنا ته اړتيا لرو، شل کاله مو صبر وکړ نور نه کېږي هم مو پانګونه کړې او هم د بریښنا لپاره زارۍ کوو، شل واري مو وعدې ترلاسه کړې خو هيڅ ګټه یې ونه کړه، د هلمند برېښنا يې راته يادوله چې جوړېږي هغه هم جوړه نه شوه.»
هغه د خپلو خبرو په دوام سره زیاته کړه، که دا حالت دوام ولري نو کندهار کې به لس فابريکې هم پاتې نه شي ځکه چې صنعتکاران ستړي شوي.
په همدې حال کې ځينې هغه چې غواړي خپل کاروبار پاکستان ته انتقال کړي وایي، په نورو هېوادونو کې ورته بېلابېل سهولتونه برابر دي.
د خوراکي توکو د يوې توليدي فابريکې مسوول صديق الله زیاتوي، د برېښنا نشتون له کبله ډېرې فابريکې اوس پاکستان ته انتقال شوي دي.
وايي، د طالبانو حکومت دې د کندهار پانګوالو ته ټول هغه سهولتونه برابر کړي چې پاکستان او کابل کې شتون لري.
هغه زياته کړه، چې پانګوال د هېواد او حکومت د ملا تير وي او په نشتون کې يې ډېرې ستونزې رامنځته کېږي.
د نوموړي په وينا، چې کندهار کې له ۳۰۰ څخه يوازې ۹۰ توليدي فابريکې پاتې دې او اوسمهال د هغو شمېر هم د کمېدو په حالت کې دی.
دغه پانګوال وويل، د وارداتي برېښنا ستنې د کندهار ولايت تر دامان ولسوالۍ پورې رارسېدلي او نور يې ټول کار په ټپه ولاړ دی.
د هغه په خبره، که د جنراتورونو لپاره تېل په لوړه بيه رانيسي نو په راتلونکي کې اړ دې ترڅو د ټولو توليد شويو توکو نرخو څو چنده لوړ کړي.
صديق الله داسې وويل: «موږ پانګونه کړې، زحمتونه مو ايستلي، دغه پيسې چې موږ دلته مصرف کړي او په داخل د هېواد کې توليدات لرو دا نور کسان نه کوي، نور حالت سم دی خو برق يوازې درې يا څلور ساعته لرو، اساسي ستونزه ده چې بايد حل شي کنې نو زما په شمول به ډېر کسان ولاړ شي.»
په ورته وخت کې د کندهار د صنعتي پارک مسوولين هم دغه ستونزې تایيدوي او وايي، څو ځله یې د حل غوښتنه کړې خو تر اوسه نه ده حل شوې.
د کندهار د صنعتي پارک امر مفتي علي محمد وايي، د کندهار د برېښنا له ستونزې څخه ټول مسوولين خبر دي خو لا دې ستونزې ته د حل په موخه کومه لاره نه ده موندل شوې.
هغه وايې، پخوا د کندهار ولايت په صنعتي پارک کې ۳۰۰ توليدي فابريکو فعاليت درلود خو اوس مهال یوازې ۹۰ فابریکې فعالیت کوي.
علي محمد وویل: «کندهار کې د برېښنا ستونزه جدي ده، خو موږ د صنعت د دوام لپاره درې وړاندیزونه لرو، کندهار ته د وارداتي برېښنا لېږد، له کابل څخه د سکرو د برېښنا پلانټ لېږد او یا دلته ډېزلي جنراتورونو ته د تېلو ورکړه.»
ومو غوښتل چې د صنعتکارانو یادې ستونزې کندهار کې د طالبانو د بریښنا ریاست مسوولینو هم شریکې کړو خو د پرلپسې هڅو بیا هم ونه توانیدو چې د دوی نظر واخلو.
