اطلاعات روز: طالبانو د ارزګان د ټولو کتاب پلورنځیو څخه د غیر اسلامي او فرهنګي کتابونو د راټولولو کمپاین پېل کړی دی.
ارزګان کې د طالبانو د اطلاعات او کلتور رياست د اطلاعاتو او ګرځندويه امر شرف الدين ساجد وايي، چې دوی د ترينکوټ ښار له ټولو کتاب پلورنځيو څخه نظارت کوي اوټولې هغه نسخي او ليکل شوي کتابونه چې د اسلام دين او افغاني کلتور خلاف وي راټولوي او له منځه یې وړي.
نوموړی زياتوي: «موږ په دې کتابخانو کې ګورو چې زموږ د کلتور او مذهب خلاف کتابونه پیدا کړو، بله موضوع دا ده چې موږ معلومات وکړه هغه دا چې دلته هیڅ کتاب پلورنځی د اطلاعاتو او کلتور وزارت جواز نه لری.»
په ورته وخت کې د کتاب پلورنځیو مسوولین او عام خلک د دغه کمپاین هرکلی کوي او وایي، چې د کتاب پلورنځیو څخه دې ټول غیر اسلامي کتابونه ټول شي.
دغه راز ليکوالان بیا وايي، د دي کار په ترسره کيدو سره به مطالعی ته د خلکو لاسرسی سخت شي.
يو تن ليکوال محمدطاهر د دغه کمپاین د پیل پر وخت وويلو چې طالبانو ته په کار ده چې د دغه ډول کتاب پلورنځیو څخه د ليدنې لپاره يوه داسې کميټه جوړه کړي چې هر اړخيزه وي او د کتابونو او نورو ليکل شوو نسخو څيړنه او تحقيق په ښه ډول وکړي.
هغه وايي د طالبانو لخوا د دغه کړونو په ترسره کيدو سره به خلک له زده کړو نور هم محروم پاتې شي او پراخې مطالعې ته به لاسرسی نه لري.
د ده په خبره :« زه فکر نه کوم چې ارزګان ولايت کې دې داسې ليکنې او کتابونه وي چې د مذهب خلاف وي ځکه د ارزګان خلک يو ډير مذهبي او کلتوري خلک دي په دغه ډول کړنو سره به لاهم ليک لوست څخه د خلکو فاصله زياته شي راځئ کتاب خانې جوړې کړو که هغه جواز ولري که يې ونه لري موږ به خلکو ته کتابونه په لاس کې ورکړو.»
واکه ته د طالبانو له رسيدو وروسته په ټول هیواد کې د کتاب او مطالعې سره د ځوانانو مینه کمه شوې او د کابل په ګډون ډیری ولایتونو کې یو شمیر کتاب پلورنځي تړل شوي دي.
