اطلاعات روز: زابل کې د طالبانو د عامې روغتيا رياست مسوولين وايي، د دغه ولايت نهو ولسواليو روغتیایي مرکزونو ته یې د ۷ لکه او ۵۰ زره امريکايي ډالرو په ارزښت ۲۰۰ قلمه درمل او طبي تجهيزات وویشل.
د زابل لپاره د طالبانو د عامې روغتيا ریيس ډاکټر عبدالحکیم حکيمي وایي، د دغو درملو د لېږد لړۍ تېره ورځ (سې شنبه، ۱۹ د تلې) د يوې شفافې پروسې له لاري د زابل مرکز اړوند دوو کلينيکونو، ارغنداب، شملزو، شاجوې، دای چوپان، شهر صفا، شنکۍ، ميزانې او خاک افغان ولسواليو ته پېل شوه.
نوموړی وايي، د ژمي په رارسېدو سره د اې ايچ ډي ايس موسېسې له لوري د دې ولايت له نهو ولسواليو روغتيايي مرکزونو سره د دوه سوه قلمه درملو او طبي تجهيزات مرسته ترسره شوه، چې ارزښت یې اووه لکه پنځوس زره امریکایي ډالرو ته رسیږي.
هغه وويل، ياد درمل او طبي تجهيزات به د راتلونکي ژمي پرمهال تر يوه بريده د لېرې پرتو ولسواليو د ناروغانو ستونزې حل کړي او پلان لري ترڅو د نورو لېرو پرتو سيمو روغیتايي مرکز ته هم درمل ولېږدوي.
د زابل د عامې روغتيا رييس زیاتوي، دا لومړی ځل دی چې دوی د زابل لېرې پرتو ولسواليو ته د شپږو مياشتو لپاره په دې اندازه د اړتيا وړ روغتیایي توکي لېږدوي.
د يادونې وړ ده چې زابل يو له هغو ولايتونو څخه دی چې ډېر کله يې د ژمي پرمهال په لېرې پرتو ولسواليو کې روغتیايي مرکزونه د درملو او طبي تجهيزاتو نشتون سره مخامخ کېږي.
