اطلاعات روز: د سویل ختیځ زون په دوو ولایتونو لوګر او پکتیا کې هم د سوالګرو راټولولو لړۍ پیل شوه، د دغو ولایتونو لپاره د طالبانو ولایتي مسوولینو ویلي چې تر اوسه یې په مرکز او ولسوالیو کې سلګونه سوالګر راټول کړي دي.
د لوګر له امنیه قومندانۍ څخه په خپره شوې خبرپاڼه کې راغلي چې له تېرې ورځې (جمعه، ۱۵ د تلې) راهیسې یې په مرکز پل عالم او ځینو ولسوالیو کې د سوالګرو راټولولو کار پیل کړی او د ثبت لړۍ یې دوام لري.
په دغه ولایت کې د طالبانو د امنیه قومندانۍ د جنايي جرمونو په وړاندې د مبارزې ریاست د مسوولینو په خبره چې د مرکزي ادارې له حکم سره سم به پیل شوې لړۍ دوام داره ساتي تر څو د مستحق او حرفوي سوالګرو کره شمېر معلوم شي.
په همدې حال کې بیا په پکتیا ولایت کې هم یاده لړۍ پیل شوې د دې ولایت د طالبانو د کار او ټولنیزو چارو ریاست مسوولینو ویلي چې له تېرو دوو ورځو راهیسې یې په مرکز ګردېز او ځینو ګڼ نفوسه ولسوالیو کې په سوالګرو پسې شوي او د ثبت په موخه یې راټولي.
د مسوولینو په وینا چې په دغو سوالګرو کې یې ډیرو د سختو اقتصادي ستونزو له امله یاد کار ته مخه کړې ده.
بلخوا بیا د لوګر او پکتیا اوسېدونکي د سوالګرو ډېرېدو لامل هیواد کې روان اقتصادي بحران یادوي او وايي، واک ته د طالبانو له رسېدو وروسته خلک په ډېر بد اقتصادي وضعیت کې قرار لري او مجبور دي چې د ډوډۍ پیدا کېدو لپاره بل ته لاس ونیسي.
د لوګر اوسېدونکي بلال حیدري اطلاعات روز سره په خبرو کې وویل، چې د اقتصادي ستونزو ډېرېدو او د طالبانو د حکومت د مسوولینو د نه پاملرنې له امله خلک سوال کولو ته مجبوره شوي، چې د هغه په وینا ډېره برخه یې ښځې او ماشومان دي.
د پکتیا ولایت د مرکز ګردېز اوسېدونکی او هټۍ وال محمد نعیم بیا له طالبانو غوښتنه کوي چې د خلکو اقتصادي ستونزو ته جدي پام وکړي. د هغه په خبره هر ورځ نړیوال موسېسات په دې ولایت کې د مرستې ویش کوي خو د مستحقو پر ځای یې نورو خلکو ته ورکوي.
جګړه، اقتصادي ستونزې او د کاري زمینې نه برابرېدل هغه لاملونه دي، چې په هیواد کې یې د سوالګرو شمېر په بېساري ډول لوړ کړی او یا هم په ناقانونه لارو بهر ته د تګ هڅه کوي.
په بشري چارو کې د ملګرو ملتونو استازو څه موده وړاندې ویلي و، چې په ټول افغانستان کې ۱۹ میلیونه وګړي له لوږې سره مخ دي.
