اطلاعات روز: د بلخ پوهنتون د ښځینه محصلانو لیلې ته د طالبانو له لوري اچول شوی قلف د دغې لیلې نجونو مات او د کاج پر ښوونیز مرکز برید په غبرګون کې یې مظاهره وکړه.
طالبانو د بلخ پوهنتون ښځينه محصلانې د لاريونونو د مخنيوي په خاطر په ليليه او درسي خونو کې بندې کړې وې. ټاکل شوې وه چې دغه لاريون نن (دوشنبه، ۱۱ د تلې) سهار نهه ۹:۰۰ بجې ترسره شي.
د طالبانو له ممانعت سره سره اطلاعات روز ته په استول شويو ویډیوګانو کې لیدل کېږي چې نجونو د لیلې قلف مات کړی او سړکونو ته راوتلي دي.
دوی «نسل وژنه بنده کړئ»، «تعلیم زموږ حق دی»، «مرګ پر تبعیض» او «امنیت زموږ حق دی» شعارونه ورکول.
د کابل په لویدیځ کې د کاج پر ښوونیز مرکز برید چې له امله یې لږ تر لږه ۴۹ تنه ووژل شول چې ډیرې نجونې وې، د دغه برید په غبرګون کې د یو شمیر پوهنتونونو ښځینه محصلانو په لاریونونو لاس پورې کړ.
تېره ورځ د هرات او بامیان پوهنتون ښځینه محصلانو په اعتراضونو لاس پورې کړی وو، چې د هرات مظاهره د طالبانو لخوا په ډزو تیت و پرک شوه.
دغه راز د کابل پوهنتون نجونې د مظاهرې د مخنیوي په موخه په پټه ټوګه د دغه پوهنتون په لیلیه کې د خوړو له امله مسمومې شوې وې.
